Hillsong Worship leh Tasha Cobbs-te hla thar 'Awake My Soul'

Grammy award hial dawng tawh Hillsong Worship leh Grammy winning artist tho  Tasha Cobbs Leonard-te chu thawk dunin kar liam ta khan hla thar 'Awake My Soul' an tichhuak.

Hillsong Worship worship leader Brooke Ligertwood leh Tasha Cobbs Leonard-te chu 'Awake My Soul' ah hian an zai dun a, streaming platform hrang hrangah an hla thar hi ngaihthlak theihin an chhawp chhuak tawh.

Pathianin amah fakna ri a hriat hian rinna (faith) thawm a hre tel ṭhin a, Pathian hmaa ṭhingṭhia ṭawngṭaina thawm chu danglamna thlen thei thawm a ni a; chumi vang chuan kan thlarau chu Pathian fakna hla sa tur a ni, tih chu he hlain sak chhuah a tum ber a ni.

'Awake My Soul' hi Hillsong Worship studio album pangana 'Awake'-ah khan he hla phuahtu Brooke Ligertwood hian a lo sa tawh bawk a ni. "Nikum khan kan kohhran, Hillsong chuan Hillsong Conference 2020, Sydney, Australia-a July-a neih turah Tasha Cobbs Leonard hi kan mikhual zinga mi a ni dawn tih a puang a. Kumin kumtir aṭang khan Tasha nen chuan kan inbe ṭan a, Hillsong Conference-a live-a hla record dun pawh kan tum a ni. Mahse Covid-19 hripui leng vangin live event leh conference a buatsaih theih ta si lo a, chumi avang chuan kan ruahmanna hmasa chu a hlawhtling thei dawn lo tih a chiang. Mahse thawhdun chu kan la duh tho a, 'Awake My Soul' hi kan sa dun ta a ni, tiin Brooke Ligertwood chuan a sawi.

Kum 2004-a Delirious an thawhpui hnua Hillsong Worship-in thawhpui an neih leh hmasa ber chu Tasha hi a ni.

Hillsong Worship hi Christian music huangchhungah chuan ngaihhlut hlawh reng an ni a, an hlate chu tluklehdingawn 2 chuang stream tawhin, album pawh maktaduai 20 chuang an hralh tawh a ni. An hlate hi kar khatah ringawt mi maktaduai 50 vel lai chuan an sa nia chhut a ni bawk.

Gospel artist hmeichhe zingah chuan a hlate hi hralh kal ber zinga mi a ni. Kum 2013-a RIAA® Platinum a hmuhna a single hla lar tak 'Break Every Chain' aṭang khan khawvelin a hre ṭan a, RIAA® Gold album pahnih a nei tawh.

Kum hnih a zawnin Billboard Music Award for Top Gospel Artist a dawng thei a ni.