Jt Production 'Nov 29 (Ka thinlung hmutu)' ngaithlatu- te'n an hlut

Tlangzarh a nih hma hauh aṭangin a audio a leak tawh a, mi tam takin nalh an ti a, music video an nghakhlel hle tih a hriat. YouTube-a a thunawn ringawt dah chhuah pawh mi sing ruk chuangin an ngaithla nghal vat a ni.

Chutiang khawpa mipuiin an nghahhlelh Jt Production hla 'Nov 29 (Ka thinlung hmutu)' chu Zirtawpni liam ta khan The Friday Show-ah an rawn chhawp chhuak ta rup mai a, ni thum chhung lekin mi nuai thum chuangin an ngaithlain an thlir der mai! Tunhnaia Mizo hla hit ber a ni lo tih ngam rual a ni lo.

The Friday Show hian YouTube-a an description dah aṭanga a lan dan chuan he hla hi Jt Production nen hian kum khat kal ta vel aṭang khan an buaipui ṭan tawh a nih hmel a, a hla pawh an peihfelna a rei tawh thu leh an beisei loh taka a leak tak avangin an tlangzarh tum hun November 29 pawh nghak chhuak zo loin an tlangzarh ta tih a tarlang.

He hla 'story' hi The Friday Show duan niin, Jt Production hian hlaa lo siamin a thlukte a lo siam ta a ni. November 29-ah erawh Jt Production YouTube channel-ah lyrics video zaipui theih turin a awm dawn a nih hmel.

Ka thinlung hmutu hla tlangzarh a nih hmaa a leak chungchanga Vanglaini zawhna chhangin Jt Production chuan, "A leak out dan kha chiang taka sawi thiam a har a. Ṭhianṭha leh duhsak zual bik angte chu (Mizo kan nihna zawnah) min lo dil chuan pek loh emaw kha a lo nuam tawh lo ṭhin a. Chungte aṭang chuan a nih kan ring ber," tiin a leak-na tak erawh a hriat loh thu a sawi. Mizote hi helam kawng, kan property ni lo thehdarh lo tur hian kan harh thar a ṭul hle niin a lang.