Kurt Cobain-a guitar $mtd 6-in hralh

Nirvana frontman Kurt Cobain-a'n MTV Unplugged-a a perh, 1959 Martin D-18E electric-acoustic guitar chu Julien's Auctions Music Icons event-ah Inrinni khan lilam-naah  $maktaduai 6 laiin an hralh.

He acoustic guitar hi kum 1993-a a TV gig theihngilh tawh ngai loh tur, MTV Unplugged-ah khan a perh a, he show an neih aṭanga thla nga liam hnuah Cobain hi a thi a ni. Nirvana guitar emaw, an bungrua emaw hralh tawh zinga an la hralh to ber a ni nghal a, RODE Microphones founder Peter Freedman chuan a lei a ni.

"He iconic guitar hi lilam a ni tih ka hriat khan ka dam chhunga ka lei theihna hun ṭha awm chhung a ni tih ka hria," tiin Freedman chuan a sawi a, "Nirvana Unplugged kha ka record duh ber zinga a mi a ni reng a, live performance film-a capture tawh zinga ṭha ber a ni bawk," tiin a sawi bawk.

Julien's Auctions hian a hmain Kurt Cobain bungrua an hralhna aṭangin world record an lo siam tawh a, MTV Unplugged-a a hak tho a cardigan hak hi $334,000 laiin an lo hralh tawh a, a Fender Mustang guitar pawh  $340,000 laia an lo hralh tawh bakah Nirvana paper plate set list Cobain-a ziah pawh $22,400-in an hralh tawh a ni.

Kurt Cobain hi April 7, 1994 khan Lake Washington Boulevard-a a chenna in bula green house-ah hun eng emaw chen chin hriat loha a awm hnuah a ruang an hmu a, April 5-a thi angin an puang thung a ni.