Driver Kima'n a 'Drive' ṭan ta

Tualchhung film hmuhnawm chhuak thar a awm, a hming chu Driver Kima a ni. Mizo Film Award Best Actor nilai Papuia Pachuau channa hi Thawhlehni zan aṭang khan en theih a ni, a duh apiang tan Lersia Play aṭangin entik lai pawha en theih a ni.

In-House buatsaih Driver Kima hi darkar hnih chhunga rei a ni a, a hmuhnawm bakah changtute an thiam avangin pawisa chawia en a inchhir awm loh ang, a changtunu pawh Miss Mizoram lama sulhnu nei tawh Esther Sailo a ni, sawi belh tam a ngai lo.

Mizo film leh khawvel film tam zawk thlir ila, a changtupa hi 'Hero' an ni ṭhin. Driver Kima erawh a film hming aṭang reng pawhin chungnung leh turu a ni hran lo, mahse a nihna anga lang chhuak ngam Mizo tlangval a ni, thawnthu phuahtu duh ang ngeiin Papuia'n a chang thiam tawk bawk.

Chhungkaw dinhmun inthlau tak kara hmangaihna a nih avangin love story ril tak a awm, a ti hmuhnawm zual turin 'crime' a inzep zauh bawk. Tualthihna rapthlak chhui chhuak tura Esther Sailo huaisenna leh, dikna ṭan tura Papuia rilru pauhkhauh zia hmu chak tan Lersia Play-ah en mai tur a ni.

'Green Rocket' tih hi Mizo ṭhalai zingah an mikhual lo, an star pawimawh Liltoto leh Papuia hi an inkawp asin' YouTube lama 'Ramhmangaihi' en tawh tan Liltoto talent neih ṭhat zia inhrilh nawn a ngai lo - Driver Kima film-ah pawh a nihna tak a lantir chiang hle.

Mizo Film Award buatsaihtu zinga mi, journalist Lawmkima Tlau chuan, "Mizo film chhuak thar a awm reng a, tun hnaiah pawh chhuak leh mai tur a la awm. Ka phak tawk tawk ka en zel, tun ṭuma mi Driver Kima chu a danglam khawp mai, darkar hnih chhung a hmuhnawm," tiin Vanglaini a hrilh.

In-House hian nikum khan Ka Bialnu tih film an lo ti chhuak tawh a, an film hmasa a director Drew Pachuau bawk kha tun ṭumah pawh hian director a ni leh a, a kutchhuak hmasa thlir tawh ten Driver Kima an thlir leh ngei ang.