Predator 5?

Sc-Fi film siam chhuah tawh zinga ngaihven hlawh ber pawl Predator franchise pangana siam turin hmalakna a awm leh tawh a nih hmel a, Dan Trachtenberg chuan he film hi a direct dawn a, thuchiang dang erawh hriat tur a la awm lo.

Predator 5 chungchangah hian thuchiang em em hriat tur la awm lo mah se helam buaipuitute chuan eng eng emaw an sawi leh nasa tawh hle a, hemi chungchang hre thuk deuha inchhal Alien vs. Predator Galaxy chuan Predator 5 hi hmasang huna thil thleng anga chan a ni dawn tih an tarlang a, hmasang America ram neitute hunlaia thil thleng angin an chang dawn niin an tarlang.

Predator 5 siam a ni dawn tih chungchang hi Deadline Hollywood chuan an tarlang hmasa a, hemi hnu lawk hian director tur Dan Trachtenberg chuan rawn tichiangin kum li dawn chu an buaipui tawh tih thlengin a sawi lang a ni.

Arnold Schwarzenegger channa Predator film hmasa ber khan kum 1987 khan tichhuah a ni a, kum 1990 khan a chhunzawmna Predator 2 chu tihchhuah a ni leh bawk.

Predator film pathumna Predators chu kum 2010 khan tihchhuah leh a ni chauh a, a palina The Predator chu kum 2018 khan tihchhuah leh niin a hlawhtling hle.

Predator film series piah lamah hian kum 2004 khan Alien vs. Predator tihchhuah a ni bawk.