Lord of the Rings actor Sir Ian Holm a thi

The Lord of the Rings film-a Bilbo Baggins upat hnu lema chang Sir Ian Holm chu Zirtawpni liam ta khan kum 88 mi niin a thi.

Ian Holm thupuangtu chuan a thih thu hi a puang a, a chhung leh khatte bulah damdawi-ina a thih thu a sawi bawk. Parkinson kaihhnawih natna avanga thi a nih thu sawiin, milar tam takin an uina thu an puang chhuak nasa hle.

Sir Ian Holm Cuthbert hi September 31, 1931-a piang niin film 50 chuangah a inlan a, TV show-ah pawh eng emaw zatah a inlan a ni. 1960's chho aṭang khan film industry a luhchilh tawh a, chawimawina pawh a dawng hnem tawh hle a ni.

The Hobbit film series leh The Lord of the Rings-a Bilbo Baggins lema a chan avangin tunhnaiah hriat a hlawh thar leh a, tunhma pawhin film lar tak takah a chang hnem hle a, Alien(1979)-ahte pawh khan inlanin Alice Through the Looking Glass, The Day After Tomorrow, Lord of War leh Renaissance-ahte pawh khan a inlan bawk.

Kum 1989 khan Commander of the Order of the British Empire (CBE) chawimawina hlan a ni a, 1998 khan Knight Bachelor chawi­mawina hlan a ni leh bawk a ni.