TBC Zaithanpuia Kum bul music video thar ; Andrew-a nen hmachhawp an nei mek

Nikuma Ṭhazual Fakna chart-a pakhatna luah thei mipa tlem te zinga mi TBC Zaithanpuia chuan kum 2017 bul a Ṭan Ṭha a, kum bulah music video thar a nei thei nghal.

TBCA music video thar hi ‘Zawh ka zuam lo’ tih hla kha a ni a, hla thar a ni lo. He hla hi kum 2014-a album a tihchhuah ‘Isu ka hmangaih che’-ah khan a lo dah tawh a, audio-a a awm reng hnuah music video hian a siam. Zirtawpni khan TV-ah a dah lut tawh a ni.

Nikum khan TBCA music video kan hmu tam lo a, kumin­ah erawh nikum aia tam zawk deuh kan hmuh a rinawm. Tuna TV-a a dah luh thar bakah hian hla dang pahnih hmachhawp a nei a, engtikah nge kan hmuh ang tih erawh sawi a har; kumin chuan kan hmu ngei ang.

“Zawh ka zuam lo’ tih hla hi keima phuah a ni a, Shillong-a kan shot a ni. Tunlaiin fakna huang chhung­ah hla lehlin a tam hle a, a mawiin a nalh pawh a nalh hlawm. Hla lehlin hi a hara a hlutawm hle rualin mahni hla phuah ngei sak hi a hlu lehzualin ka hria a, ‘Zawh ka zuam lo’ tih hla pawh hi music video-in ka siam ta a ni,” a ti.

TBCA hmachhawp zinga hmuh chakawm ber, ngaihthlak chakawm ber tur chu Andrew Laltlankima nena an hla phuah hi a ni. TBCA chuan, “Andrew nen kumin hian music video siam dun kan tum a, hla pawh kan phuah dun tawh nghe nghe,” a ti. Tun thla hi chuan an buaipui hman dawn lo a, February emaw March thla velah emaw chuan an buaipui hman tawh ang. Tunlai Mizorama fakna huang chhunga mipa zaithiam kan neih ṭhat ber ber an ni a, chuvang chuan an hla tur hi a nghahhlelhawm hle.