Drake-a ‘Views’ an hralh hnem ber

Kum 2016 chhunga US-a album hralh hnem ber chu Drake-a album hlawhtling zet mai Views kha a ni.

Nielsen Music chuan nikum, January 1 aṭanga December 29 chhunga music album tihchhuahte an hralh zat a tarlang a, chutah chuan Drake-a album Views hi an hralh hnem ber.

Views album hi nikum April thlaa tihchhuah kha a ni a, nikum chhung zawng khan album tlukpuite nen vek copy maktaduai 5.75 zet hralh a ni. Album tlukpui anga chhiarah copy maktaduai 4.14 lai a hralh tling a, album pangngaia hralh chu copy maktaduai 1.61 a ni.

Kum 2015-a album hralh hnem ber chu Adele album ‘25’ kha a ni. Views nena khaikhinin an ṭhatna hmun a inang lo. Album pangngai hi Views aiin an hralh hnem daih a, copy mtd 2.37 zet an hralh a, mahse album equivalent-ah 25 hian Views a pha lo hle. Views hi streaming equivalent album-ah chauh pawh maktaduai 2.02 zet a tling.

Kum 2016 chhunga album hralh hnem ber pahnihna chu Adele album 25 kha a la ni tho a, Beyonce album ‘Lemonade’ chu pathumna niin, Rihanna album ‘Anti’ chu palina a ni pha a, Twenty One Pilot album Blurryface chu pangana a ni.