Kumtharah pawh Lilzo a ropui

Kum 2016 kha Zoram music khawvelah chuan Lilzo ropui kum a ni a, kum tawp lamah phei kha chuan Lilzo hi a chungnung ber. Chutiangin Ṭhazual chart-ah pawh Lilzo a ropui ber a, a la ropui zel.

Lilzo hla ‘Ka sawm che’ tih chu pakhatnaah a awm leh a, a zawnin pakhatnaah vawi hnih a awm ta. Lilzo ‘Ka sawm che’ tih hla hi Hontrade International Ṭhazual Lengzem nikuma tihchhuah hnuhnun ber, December 12-ah khan pakhatna a ni tawh a, kum a thar a, kumtharah pawh pakhatna bawk a luah leh.

Lilzo tia kan hriat lar, Hruaitea hian official-in music video pali a tichhuak tawh a, a music video tihchhuah tawhte YouTube lamah pawh entu a ngah tawh hle. YouTube hmanga kan hriat lar Hruaitea hian kum tawp chhung khan hmun hrang hrangah stage a luah hnem a, Mizoram Music Festival, Sialsuk Tlangah pawh a che ropui hle a nih kha. Kumtharah pawh a la awl chuang lo a, hmun hrang hrangah zai tura sawmna a la dawng reng.

Hruaitea hian kumin chhoah pawh hian music video thar min entira min ngaihthlaktir leh a tum. Ama sawi dan chuan tun February thla vel hi chuan buaipui ṭan a tum a, mahse sawmtu hrang hrang a neih avangin a duh angin a buaipui hman loh rinawm a, hemi aia tlaiah pawh kan hmu mai thei.

Mizo Idol judge Mimi Ren­thlei hla ‘Hrilh a’n ka mawi si lo’ tih chu pathumna aṭangin pahnihnaah a rawn kai. Hun eng emaw chen music khawvelah hnuhma tharlam tak a neih tawh loh hnuin nikum khan album a tichhuak a nih kha, a hlawhtlinpui chho mek. A hmaa pakhatna pawh lo luah tawh, BOG, Hlimhlimi leh RickyDrac te sak ‘Rûnah’ tih chu pahnihna aṭangin pathumnaah a chhuk.

Hontrade International Ṭhazual Lengzem

1 Lilzo - Ka sawm che

2 Mimi Renthlei - Hrilh an ka mawi si lo

3 Samuela Chhangte - Ka hmangaih reng ang che

4 BOG, Hlimhlimi, RickyDrac - Rûnah

5 Caseys Secret - Duhaisam

6 Thiamchatira Ralte & Duati - Kan chhing ngei ang

7 Mercy Remsangmuani - Hmangaihtu ngaiin an ṭap e

8 Kimkima - Ka zei an ti ṭhin

9 Grace - No khat

10 Tetea - Duhaisam tikimtu