Ni tina Facebook hmangtu an pung leh tawh

Kum 2022-ah khan Facebook siam chhuah aṭanga a vawi khatna turin hmangtu nasa takin an tlahniam a, mahse Nilaini-a Facebook parent company Meta-in report a tihchhuahah chuan kumin thla hmasa thla thum chhungin ni tina Facebook hmangtu chu an pung leh tawh tih leh tluklehdingawn 1.96 an awm thu an tarlang.

Kum liam taa hmangtu an tlakhniam avang khan Facebook hlutna pawh a tlahniam nasa hman viau a ni. Mahse Nilainia hmangtu an pun thu report tihchhuah a nih hnuah erawh a pung leh hlek tawh niin BBC chuan a tarlang.

Meta boss Mark Zuckerberg chuan," Mi tam zawkin kan service hi ṭum dang zawng aiin an hmang nasa a, kan thil siamin khawvel hmun hrang hranga mipuite rawng a bawlsak dan hi ka chhuang hle," tiin a sawi.

Mahse, Instagram leh WhatsApp neitu Meta hian report duhawm lo pawh an nei tho. Kum 10 chhunga an sum lakluh punna tlem ber ṭum an tawng mek thung. Kumin thla hmasa thla thum chhungin an revenue chu 7% chiahin a pung a, $tld 27.9 an lalut. Mi thiamte chuan Ukraine indona vanga thil man sang leh economy nasa taka a nghawng vangin advertisement lamah nghawng a neih vang niin an sawi.

Meta chuan tun thla thum report an tihchhuah leh hunah chuan $tld 28-30 vel an lakluh tawh an rin thu an sawi a ni.

March thla khan Russia chuan Facebook leh Instagram hman a khap a, hei hian nasa takin nghawng a nei niin mithiamte chuan an sawi bawk a ni.