Billboard Hot 100-a BTS hla 'hot' zualte chu...

BTS-in K-pop mai ni lo, rimawi khawvel pum ang pawha huhang an neih ngah zia hi tu hai rual a ni lo. Ram hrang hranga ARMY-te'n thawm an nei ring ṭhing bawk nen RM, Jin, Suga, J-Hope, Jimin, V leh Jungkook-te chuan The Beatles tluk hialin huhang an nei ngah niin mi tam tak chuan an ngai tawh.

K pop septet-te hi kum 2013 vel aṭang khan rimawi khawvelin a hmelhriat chho ṭan a, kum 2017-a 'Love Yourself: Her' an tlangzarh hnu phei chuan Billboard chart lamah pawh che ṭhain he album hi Billboard 200 chart-ah pasarihna hial an nihpui. Chuta ṭang chuan khawvela music industry pui ber US-ah sulhnu ṭha tak tak an hnutchhiah chho a ni. An single 'DNA' hmangin Hot 100 chart an luhchhuah ṭan a, English single 'Dynamite' an tihchhuah hnu phei chuan Hot 100-ah neitu chan an chang chho a ni ber. Halsey, Nicki Minaj, Coldplay leh mi hrang hrang thawhpuiin khawthlang music industry lamah pawh mi ngaihven hlawh ber an ni ta zel a ni.

Kum 2017 kum tawp dawnah khan American rapper Desiigner thawhpuiin 'MIC Drop' an tichhuak a, hei hi kar 10 lai Hot 100 chart-ah chamin an chet ṭhat ber tumin 28-na an ni. Kum 2020 MAP OF THE SOUL: 7 single 'On' kha palina hial an nihpui bawk.

Kum 2018-a 'Fake Love' an tihchhuah kha a hit-in darkar 24 chhunga YouTube debut record hialte pawh siam mah se top 10-ah a lang pha ṭawk a, 10-na aia sang a ni lo. Halsey an thawhpuina 'Boy With Luv' pawh kha a lar hle nachungin pariatna aia sang a ni lo.

Mahse maw..
December 5, 2020 khan 'Life Goes On' an tichhuak a, hei zet chu a 'hot' ta viau. A vawi khatna atan Billboard Hot 100 chart chung berah an dinpui ta vang mai le. 'Permission to Dance' pawh kha kar sarih lai chart-ah lanpuiin an tihchhuah aṭanga kar khatah Hot 100 chart topper a ni nghal.

Nikuma Coldplay nena an tihchhuah 'My Universe' kha Hot 100 topper a ni a, Jawsh 685 leh Jason Derulo an thawhpuina 'Savage Love (Laxed - Siren Beat)' kha chart topper niin kum chanve dawn lai chart-ah a lang hial.

September 5, 2020-a an tihchhuah 'Dynamite' kha English hla chart topper an nihpui hmasak ber a ni a, kar thum lai Hot 100 topper a ni. Chu chu an chet ṭhatpui ber erawh a ni lo. 'Butter' hmang khan record ropui tak an siam a, Hot 100 topper kar 10 lai a ni. Hetiang dinhmuna ding thei 40-na chiah an la ni a, he hla hmang hian YouTube premiere ropui ber record hialte pawh an siam a nih kha.

BTS hian Hot 100 topper hla paruk an nei tawh

Hot 100-a BTS hla hit zual pathumte chu:-
1 Butter - Vawi 10 chart topper
2 Dynamite - Vawi 3 chart topper
3 Savage Love (Laxed - Siren Beat) - ft. Jawsh 685, Jason Derulo - Chart topper a nih bakah kum chanve vel chart-ah a lang