James Corden-a'n Late Late show a mangṭha dawn

English comedian leh lemchan thiam, US lama late-night talk show lar tak 'The Late Late Show with James Corden' host James Kimberley Corden chuan nakkum lamah The Late Late Show a chawlhsan tawh dawn.

Ningani khan Los Angeles, California-a CBS network show kaltlangin hemi chungchang hi a puangzar a, "Thutlukna siam harsa ber a ni," tiin a sawi hial.

"He show hi ka zinkawng tawp ber turin ka ngai ngai lo a, min lo lawmna avang hian tum aia rei awm pawh ka tum ngai lo. Nuam erawh ka ti reng a, mahse tun aṭanga kum khat a ral leh chuan kalsan a hun ve tawh niin ka hria a, ka hmalam hunah eng nge awm hmuh a hun tawhin ka hria a ni," a ti.

James Corden hian kum 2015 khan lemchanthiam Craig Ferguson chu thlakin Late Late Show hi a host ṭan a, US-ah chuan TV show lar ber zinga mi nizuiin Emmy Awards te hial pawh a dawng tawh a ni. Late Late Show-ah hian thil thar 'Drop the Mic' leh 'Carpool Karaoke'-te tichhuakin show entute pawhin hei hi an hlut hle nghe nghe a, CBS network CEO leh President ni bawk George Cheeks pawhin la cham reng se a duh thu sawiin, season khat a la awmpui thei tur chu lawmawm a tih thu a sawi ve bawk.