'Clash of the Stars' - a hun a hnai zel

LPS Promotions leh K & P Entertainment chuan May 14 hian Dawrpui Multipurpose Centre-ah professional boxing, 'Clash of the Star' a buatsaih dawn a, Mizo leh Manipuri an innuai dawn bakah rapper G'nie leh lemchanthiam Papuia Pachuau an inhmachhawn dawn.

He hunah hian HC Lalramfela leh C Lalhruaitluanga'n a vawi thum nan professional boxing an khel dawn a, Zochhuanawma Fanai leh Zoengmawia Hlondo chuan professional luhchilh nan an hmang ve thung ang.

LPS Pro Fight bantamweight champion pawh ni tawh Ramfela'n lightweight huangah rei lote chhungin Parash Chauhan (Gujarat) a knockout tawh a, tlawm nei loa vawi thum chak zawn turin AK Naoton lakah round khat bak a mamawh a ring lo.

Nikum November 27 khan Dawrpuiah LPS Fight Night II huaihawt a ni a, Hruaia pawhin super welterweight huangah mittlung takin an khel a nih kha, ani hi Laishram Ronalson Khuman nen an inhnek dawn thung.

March 2021 khan Zochhuana'n professional luhchilh theihna hun ṭha a bawhpelh hnuah bul a ṭan ṭha leh dawn a, Thokchom Sagar nen an innuai ang. Super Boxing League-a tel tawh Zoengmawia Hlondo chuan Laikhuram Shanti Kumar a bitum ve thung dawn a, Ramfela leh Hruaia tih loh boxer dang zawngin a vawi khat nan professional boxing an khel dawn a ni.

Manipuri boxer paliin Aizawl leilungah professional huang dai lutin chona an hmachhawn dawn a, LPS Pro Fight leh inelna danga hnuhma nei tawh Mizo boxer ṭhate'n dimdawina tel loa lo mikhual an tum.

He boxing show-ah hian rapper G'nie leh actor Papuia Pachuau chuan an inchona hruihrual chhungah chinfel an tum a, boruak siamtu ber ni mekin Ramhlun North tlangval pahnih hian nikum kum tawp aṭang khan inhnek turin mumal takin inbuatsaihna an kalpui tawh. An rih zawng leh san zawng inang lo mah se inhnek turin harsatna an nei lo va, boxing hmuhnawm tak lantir theih an inbeisei bawk.

Indian Boxing Council chuan he inhnek huaihawt tur hian phalna a pe fel tawh a, LPS pay-per-view leitute hnenah live telecast-a pek chhuah a ni ang.