Nunui music video thar tur ‘Malin ka awm lo’
Kari Jobe hla mawi zet mai “I’m not alone” tih hla kha Rev. Lalhmunmawia Pachuau chuan Mizo ṭawnga letlingin Nunui hian a sa a, chu chu TV lamah pawh kan hmu thuai ang. Music leh recording hi Blue Wave Records kutchhuak a ni a, video hi Tea Videography a ni thung.
‘Malin ka awm lo’ tih hla hi tunah hian lehlin chi hnih chu sak lar mek a ni a, Nunui sak hi lehlin dang a ni thung. Nikum aṭanga music video hi buaipui a ni tawh a, amaherawhchu Nunui hi Synod Choir-a a tel avangin a bawhzui chak thei lo a, kuminah kan hmu ta chauh a ni.
Nunui chuan, “He hla hi Kari Jobe sak ka hriat aṭanga ka duh tawh leh mawi ka tih a ni. Nikum khan BZA, Blue Wave chuan Rev. Lalhmunmawia Pachuau lehlintirin, kan buaipui tawh a, Synod Choir programme neih loh kar lak kan châng a, kan siam zo thei ta hram a ni,” a ti. “He hla Mizo
ṭawnga lehlin hi Isaac-a, Chanmari sak ka hre hmasa ber a, Icon lamah pawh lehlin dang an rawn sa lar leh bawk. Miin an lo sak tawh leh lar mek a ni chungin mawi ka ti a, a thu hian min hneh êm avangin ka sa ta tho a ni,” a ti.
Music video dang siam belh zel chungchangah Nunui chuan hmachhawp han neih bur a thei rih lo. “Synod Choir-a kan term hi kum 2018 thleng a ni a, hemi chhung hi chuan rawngbawlna tur tam tak a awm avangin mimal thil a sawilawk hleih theih loh. Hunawl neih zawk châng a awm a, chutiang hunah chuan hma a lak theih hram. Chutiang a nih loh chuan music video dang emaw han sawi a theih rih lo. Rilru chuan ruahmanna te chu a nei a, hun ka neih chuan a ni ang,” a ti.