Hollywood mipa leh hmeichhe hlawh inang loah Natalie Portman-i a phun chhuak

Tunhnaia Hollywood-a buaina lian tak chu mipa leh hmeichhe hlawh zat inthlau lutuk hi a ni. Hlawh inang phutin actress te an ṭawng chhuak fo tawh a, Natalie Portman pawhin a rawn tuihnih ve ta.

Kum 2011-a film tihchhuah hlawhtling tak No Strings Attached-ah khan Natalie Portman hi Ashton Kutcher nen an chang dun a, Portman hian a hlawh ai chuan Kutcher-a hlawh chu tam zawk tak a ni tih a sawi. Portman chuan a hlawh let thum zet mai chu Ashton Kutcher an hlawhtir tih sawiin, mipa leh hmeichhiate hlawh inzat a duh thu a sawi chhuak.

“Hlawh min pek hnem ṭhin avangin hlawh chungchanga phunnawi hi a nuam lo a, a in­thlahrunawm viau. Amaherawhchu mipate nena kan hlawh inthlauh dan hi chu a tam mah mah a ni,” a ti. “Eizawnna kawng tam takah hian mipate nena khaikhin chuan hmeichhiate hian dollar khat zela cent 80 hi an siam chhuak a, Hollywood-ah chuan cent 30 chauh a ni,” a ti.

The Hunger Games-a a changtunu Jennifer Lawrence pawhin he harsatna bawk hi a sawi chhuak a, hlawh inangtlang a phut. Chutiang bawkin Scarlett Johansson te pawh a ṭawng ring pawl an ni awm e.