Ṭhazual Lengzem 2016 ; Hmeichhe 6 karah mipa 2

Kum 2016 chhung khan Ṭhazual chart, Fakna leh Lengzemah hmeichhia an chungnung zawk. Faknaa pakhatna lang hnem ber chu hmeichhia an ni ang bawkin, Lengzem huang chhungah pawh hmeichhia bawkin pakhatna an luah hnem. Mimalah chuan Lawmi Khiangte tumahin an tluk lo a, pakhatnaah a zawnin vawi li lai a awm thei.

Kum 2016 chhung khan Ṭhazual Lengzem chart hi vawi 25 tihchhuah a ni a, hmeichhe parukin pakhatna an luah thei a, mipa zingah pahnih chauhin pakhatna ni theiin, group or duo angin pathumin pakhatna an luah.
Pakhatna luahtu hmeichhiate hi Lawmi Khiangte, Remkimi Cherput, Pensy, DJ Lalvenhimi, Feli Fanai leh Rachel Lalnunkimi te an ni. Lawmi Khiangte hi mimala Ṭhazual Lengzem chart-a pakhatna luah ngun ber a ni a, a hla ‘Kan hlim lai’ hmangin pakhatnaah vawi li a awm. Pakhatnaa vawi li awm thei hi amah leh stAge ft. Sangtei Khawlhring te hla ‘Beiseina’ te kha a ni.

Pensy-i hla ‘Chelh ding rawh’ tih te, DJI hla ‘Ṭhian rinawm’ tih leh Rachel Lalnunkimi hla ‘Ka phur zo lo’ tih hlate chuan pakhatna vawi thum ṭheuh an luah a, Feli Fanai hla ‘Ti ve mai la’ tih chu vawi hnih pakhatnaah awmin, Remkimi Cherput hla ‘Zoawi lelte a fam ta’ tih chu vawi khat a lang.

Mipa zinga pakhatna luah thei pahnihte hi Thangromawia ‘Chhing mitin’ tih leh Lilzo ‘Ka sawm che’ tih hlate a ni. Thangromawia hla ‘Chhing mitin’ tih hi pakhatnaah vawi hnih kan hmu a, Lilzo hla ‘Ka sawm che’ tih hi nikuma Ṭhazual Lengzem chart tihchhuah hnuhnun berah pakhatna a ni a, kuminah pakhatna a ni leh bawk.

Group or duo zingah stAge ft. Sangtei Khawlhring ‘Beiseina’ chu a hlawhtling ber a, pakhatnaah vawi li lai a awm thei a, kum 2016 chhunga Lengzema hla hlawhtling ber a ni a, Lawmi Khiangte hla ‘Kan hlim lai’ nen pakhatna an nih zat a inang. C. Sanga leh Daduhi te hla ‘A zual zel si’ chu pakhatnaah vawi khat a lang a, BOG, Hlimhlim, RickyDrac te sak ‘Rûnah’ tih chu pakhatnaah vawi khat kan hmu bawk.