Kristian album-ah Maranatha collection hralh hnem ber

Kar liam ta chhung khan US Billboard chart-a Top Christian Albums-ah Maranatha! Music: Top 25 Praise Songs, 2017 Edition chu hralh hnem ber a ni a, copy 5000 hralh a ni. He album hi Kristian hla ṭha hrang hrang dah khawmna a ni.

Maranatha! Music hi kum 1971-a Calvary Chapel-a music ministry tura din a ni. He Maranatha! Music hian Kristian hla ṭha hrang hrang la khawmin album pakhatah an dah a, hralh a kal hle. He album-ah hian Matt Redman-a hla hit ‘10,000 Reasons’ te, Natalie Grant hla nalh em em, ‘In Christ alone’ tihte pawh a awm.

WOW Hits 2017 a ropui viau a, mahse Maranatha! Music: Top 25 Praise Songs, 2017 Edition hian a rawn khum. Wow Hits 2017 pawh hi Kristian hla hrang hrang dah khawmna tho a ni a, MercyMe hla ‘Flawless’, Mizo ṭawng pawha an lehlin Lauren Daigle hla ‘Trust in You’ te, Chris Tomlin hla ‘Good Good Father’ tihte leh, nikum chhunga Kristian hla lar tak takte dah khawm a ni.

Nikum chhung khan Kristian hla ṭha tam tak a chhuak nachungin, kum 2011 Matt Redman tihchhuah tawh 10,000 Reasons bawk hi hralh a la kal. Matt Redman chuan he hla kaltlang hian mi tam takin Pathian an hmuh phah thu a sawi a, he hla kaltlanga Pathian­in mite thinlunga hna a thawhna ten an rawn biak ṭhin thu a sawi bawk.

10,000 Reason (Bless the Lord) hla hmanga Pathianin hna a thawh tawh dan hrang hrangte Matt Redman hian la khawmin nikum khan lehkhabuin a chhuah nghe nghe.