Voltas Malsawm House Ṭhazual Gospel chart topper Seraphic Choir 'Lalnunnem'

Voltas Malsawm House Ṭhazual Gospel chart-ah roreltu thar an awm a, chu chu Seraphic Choir 'Lalnunnem' a ni.

Seraphic Choir-te hi chart hmasa lamah khan palina an ni a, nasa taka hma sawnin tunah chuan pakhatna an rawn ni ta der mai. Tuna chart topper an rawn nihpui 'Lalnunnem' hi Hlado, Nilen zai leh Hmarkhawchhingi zai inpawlh niin thla khat vel liam taah khan an tichhuak a, hun rei lote chhungin pakhatna an rawn ni ta der mai.

Ṭhazual award hial pawh lo dawng tawhtu Seraphic Choir-te hla thar hi Mizo rilrem zawng tak a ni a, pakhatna an ni thuai pawh hi a mak lo hle.

Cindy Lalthanpuii'n Awpa-a hla a rawn thar thawh leh 'Aw Pathian' chu pahnihna a ni thung a, ani pawh hi parukna aṭangin pahnihnaah rawn invawrhin chart topper a nih thuai a rinawm. Stacy Punte chuan 'Min hmang ang che' hmangin top 3 a rawn lut ve bawk a, ani pawh hian hma a sawn chak a, a dinhmun a rawn sawh nghet chho ve zel a ni.

Tunṭum Ṭhazual chart-ah hian zaithiam lar tak tak hming a intlar thla nawk a, Gospel band Faktu te, Pensy te, Lalthansangi te, Melody Lalzirliani te leh Mizo Idol Grace Lalchhanhimi-te hming pawh chart top 10-ah hmuh tur a awm.

Ṭhazual Gospel chart top 10:-
1 Seraphic Choir Lalnunnem
2 Cindy Lalthanpuii Aw Pathian
3 Stacy Punte Min hmang ang che
4 Faktu Ka felna Lal Krista
5 Pensy B. Lalthangliani Vut aiah parthi
6 Duati Renthlei Hmangaihna ropui ber
7 Lalthansangi Kalvari ka tan a par vul e
8 C. Lalremruata Thisen hlu
9 Melody Lalzirliani Chawimawi rawh u
10 Grace Lalchhanhimi I hmangaihna a lo lang ṭhin