Catholic National Youth Conference-ah Mizo ṭhalaite che ṭha

Indian Catholic Youth Movement, India rama Catholic Ṭhalai Pawl state leh region hrang hrang fuan khawm chuan a vawi li nan Nadiad, Ahmedabad, Gujarat-ah April 16 aṭanga May1 chhung khan National Youth Conference hi a buatsaih a, cultural programme-ah Mizoram aiawha kal te an che ṭha hle.

Kumin inkhawmpui thupui atan hian ‘Youth for a Synodal Church’ tih chu hman a ni a, palai 450 chuang telin hmarchhak aṭangin palai 56 telin heng palaite hi an mahni state theuh a Diocese leh Regional ṭhalai hruaitute an ni a, Mizoram aiawhin Diocese Catholic Ṭhalai Pawl President - Antony Lalremdika, General Secretary - Alan Lalrinawma, Treasurer - Angeline Paul Vanlalruati, Finance Secretary - Jerome Lalthanzama leh Samuel Lalfakzuala - Male Representative-te chu kalin Rev. Fr. James Lalruattluanga, Asst Diocese Youth Director chuan a kalpui a ni.

Cultural programme-ah Mizoram aiawha kalte hian Dawhzawm lam, Mizo hnam lam hrang hrangte an en tir a, hei hian mipui lawm a hlawh hle a ni. He Cultural Programme hi Alan Rinawma, Mizoram tana Diocese General Secretary leh Northeast Region tana General Secretary ni bawk chuan hneh takin a kai hruai a ni.

Conference-ah hian Indian Catholic Youth Movement hruaitu thlanna neih nghal niin North East Region ai awhin Antony Lalremdika, Mizoram tana Diocese President ni mek chu Joint Secretary atan thlan a ni a, Mizo zinga India ram pum huap Catholic ṭhalai pawl OB kan neih hmasak ber tur a ni nghe nghe.

National Youth Conference 2023 chu Northeast Region-in a thleng dawn a ni.