Met Gala-ah Blake Lively a mawi leh pek hle!

Super Bowl of fashion ti hiala mi ṭhenkhatin an sawi, mi lar fuankhawm tamna ber tia sawi ngam Met Gala chu Thawhṭanni khan buatsaih a ni leh a, mit la tak tak leh inchei dan hmuhnawm tak tak hmuh tur a tamin nimin lamah kha chuan Met Gala-a kalte thlalakin internet a luah khat a ni ber.

New York City Metropolitan Museum of Art’s Costume Institute puala kum tina buatsaih ṭhin Met Gala hi kum 2020 khan Covid-19 vangin neih a ni loa, nikum leh kuminah erawh neih a ni leh ta a ni. Kuminah hian thupui atan 'In America: An Anthology of Fashion' tih hman a ni a, Regina King, Blake Lively, Ryan Reynolds, leh Lin-Manuel Miranda-te chu co-host niin Tom Ford, Adam Mosseri leh Anna Wintour-te chu honorary chair an ni thung. Lenny Kravits chu headline performer a ni a, Instagram chuan kumin Met Gala hi an sponsor bawk.

Event co-host Blake Lively chu kumdang ang bawkin a mawi lehpek a, ngaihven hlawh ber zinga mi a ni leh. A incheina thuam mawi tak chu Statue of Liberty, Empire State Building leh Grand Central Station ceiling pawl aṭanga idea an neih hmanga siam niin Lively chuan,"Ka thawmhnaw influence tur hian fashion lam en loin New York City architecture ka en zawk a ni," tiin a sawi.

Lively hi an pa Ryan Reynolds nen inlan dunin internet lamah an nupa Met Gala kal thlalak hmuh tur a tam hle.

Kim Kardashian bawkin ngaihven a hlawh leh
May 19, 1962 khan a hunlaia nula hmelṭha hmingthang Marilyn Monroe chuan Madison Square Garden-ah khatih hunlaia US President, John F. Kennedy piancham lawmpuina hlan turin vawiin thlenga ngaihven hlawh gown a ha a, chu a gown hak ngei mai chu Kim Kardashian chuan a rawn ha a, hei hian ngaihven a hlawh viau. “Happy Birthday, Mr. President” dress tia hriat lar nizui Monroe-i'n a inbel khan, a inbel aṭanga thla thum lek hnuah a boral zui a nih kha.

Monroe gown lar tak ha turin Kardashian chuan a rihna pound 16 lai a hloh a ngai a, "Chona lian tak a ni, ha tawk turin ka bei nasa hle," tiin a sawi nghe nghe. Kha thuam kha a tirah chuan $1,440.33 man a ni a, Jean Louis design niin kum 2016 khan Ripley’s Believe or Not! museum, Orlando, Florida chuan $mtd 4.81 laiin an lei a ni. Monroe pawh khan a hak dawn khan a tawt viau a, a hak pah khan an ṭhui leh zel niin an sawi

Kim Kardashian hi a ngaihzawng thar Pete Davidson nen an inlan dun a ni.

Dangdai
Met Gala-ah hian dangdai leh maksak taka inchei hmuh tur an awm deuh ziah. Kuminah pawh Alessandro Michele leh Jared Leto-te chu inang chiah chiahin an inthuam a, an sam leh an hmuihmul an zuah bawk nen phir an ang hle. Anni pahnih hian Gucci thuam inbelin lawm hlawh ber pawl an ni nghe nghe.

Bad Bunny inchei dan pawh a dangdai a, Riccardo Tisci design gender-bending Burberry thuam kha a common lo viau.

Marilyn Monroe thuam nen Kim Kardashian

Elon Musk
Khawvela mi hausa ber, tun hnaia chanchin ngah tak Elon Musk pawh Met Gala-ah hian hmuh tur a awm a, a nu Maye Musk nen Met Gala red carpet an zawh dun a ni.

Euphoria star Sydney Sweeney pawh a vawi khatna atan a inlan a, nuam a tih hmel hle.