Justin Bieber album tharah John Mayer

"A thilpek dawn khatiang taka a'n hmang chhuak hmuh kha a ropui tak zet... ani chu level danga awm a ni " - Justin Bieber

Album thar a tihchhuah aṭangin kum khat emaw chiah la vei mah se Justin Bieber chuan album thar a peihfel leh ṭep tawh a, a chhuak har lutuk tawh lo mai thei.

Apple Music Ebro Darden nena an inkawmna Thawhlehnia tlangzarhah chuan Canadian singer Justin Bieber chuan hemi chungchang hi sawiin, a album thar turah chuan midang thawhpui a nei dawn a, chung zingah chuan American guitarist/singer John Mayer pawh a tel tih a sawi tlat mai.

Bieber chuan,"Tlangzarh hun tur chu kan la tifel chiah loa, mahse kan peihfel tawh dawn tih erawh ka sawi thei. Kan peihfel ṭep a, a ṭha dawn khawp mai. Ka phur tawh tak zet a, thawhpui ṭha takte pawh ka nei a, tun aṭanga rei lutuk loah kan drop thei ang," tiin a sawi.

Ebro Darden-a'n a thawhpui chungchang a zawh zuina chu chhangin John Mayer pawh a tel thu a sawi. "Guitar solo mawi lutuk, chu chu ka tan chuan a 'cool' hle," a ti. "Hun rei tak tawh aṭanga ka ngaihsan tawh a ni a. Henson studio-a hla pakhat buaipuia ka awm laiin a lokal a, 'Booth-ah ka lut thei ang em?' tiin min rawn zawt a, a luh hnu chuan lo chhuak lehin guitar solo a rawn nei a, a thilpek dawn khatiang taka an hmang chhuak hmuh kha a ropui tak zet, khatiang thil tawn kha, ani chu level danga awm a ni, ropui tak a ni," tiin Mayer chu a fak hle.

Justin Bieber hian a album hnuhnung ber 'Justice' kha Billboard 200 chart-ah pakhatna a nihpui a, Grammy awards 2022-ah pawh nomination pariat lai a hmuhpui a ni.

John Mayer hian tunah hian Sob Rock tour a nei mek a, US hmun hrang hrangah a zinkual mek thung a, music thar tihchhuah lam erawh a sawi ri rih lo.