MIZO FILM THAR 'KA U LIANA' THLA TAWPAH

Mizo film industry-in hma sawn zela, film ṭha tak tak leh en tlak tak tak a chhuak zel a, tunah pawh film thar hmuhnawm tak tur 'Ka u Liana' chu buatsaih leh mek tawhin hun rei lote hnuah an tlangzarh dawn.

'Ka u Liana' hi Zote Entertainment buatsaih niin thla tawp lamah hi chuan tlangzarh hman an inbeisei. Nikum lama 'Nutei Thingpui Dawr' tih siamtute tho kha an ni a, film siam lamah sulhnu an lo hnutchhiah ṭha tawh bawk a, film ṭha tak an rawn chhawp chhuah ngei a rinawm.

Aaron Malsawmdawngzuala chu script ziaktu a ni a, producer leh director chu Mike a ni thung.

Eng lam hawi nge a nih dawn?
'Ka u Liana' hi fahrah unau chanchin a ni dawn a, hrehawm taka hun an hman chhoh dan khawngaihthlak tak, unau inhmangaih tak, harsa tak kara seilian chho chanchin a ni dawn a, a hmuhnawm ang. Chhungkaw pawimawhna pholan a nih dawn bakah pianphunga rualbanlo ( Vohbik) te kan chhawnchhiah dan ṭha lote pawh tarlan a ni dawn a, Mizo rilrem theih dan tur bera a thawnthu hi duan leh buatsaih a ni. Hmunawm piah lamah zirtir ṭha tak neihtir an tum niin film siamtute chuan an sawi.

Zaii Hauchhum 'Ka u Liandova' leh 'Ka u Liana'
A film thawnthu ziaktu Aaron Malsawm-dawngzuala hian kum 2019-ah daih tawh khan he thawnthu hi a nei tawh a, film-a siam atana a ziah a ni. Mahse a duhthu a sam theih loh avangin a dahṭha leh rih a, kum hnih chuang lai chu thul mawngah a khung hman.

Tunlai Mizo zaithiam zinga lawm hlawh ber pawl Zaii Hauchhumi'n 'Ka u Liandova' hla a rawn tihchhuah khan phurna leh chona nasa tak a pe a, thul mawnga a khung tawh thawnthu chu a rawn phawrh leh ta a ni. Zaii hian he film OST hi a sa nghe nghe.

Changtu turte chu...
Zaithiam Vanlalhmangaiha kan hmu dawn a, ani hi Liana lemah a chang ang. 'Nutei Thingpui Dawra'-a changtu zinga mi Esther Lalnunmawii kan hmu dawn bawk. Zaithiam Thawhlehnaniropuia kan hmu dawn a, 'Duhaisam'-a changtunu Ruthi Chenkual bakah Mawimawii, Abby, Joseph Robinson leh Lateii te an inlan dawn bawk a ni.

Zaninah OST
'Ka u Liana' OST 'Ka Chelh Ngam lo Che' Zaii Hauchhumi'n a sak chu MDM lama register fel tawhin zanin hian tlangzarh a ni dawn. Zonet lam bakah MDM YouTube channel lamah thlira ngaihthlak theihin a awm dawn a ni.