35th Rock and Roll Hall of fame Live induction ceremony ṭhulh

Rock And Roll Hall Of Fame Foundation chuan Ningani khan thuchhuah siamin Covid-19 hripui leng vangin kumtina an neih ṭhin live induction ceremony chu an ṭhulh tih an puang.

Live induction ceremony hi ṭhulh mah se chawimawina an hlan turte chu hlan dan tur kawng dang an dap tho a, TV special an buatsaih dawn thung. Chawimawina hlanna programme hi HBO-ah an pe chhuak dawn a, November 7 hian HOB Max-ah stream theih a ni dawn bawk. 

Kumin induction ceremony hi a vawi 35-na tur a ni a, ruahmanna hmasaah chuan May 2 hian neih tur a ni a, mahse hripui leng vangin an ruahmanna hmasa hi an kaltlangpui thei dawn ta lo a ni. Rock And Roll Hall of Fame 2020 inductee class-ah hian Depeche Mode, The Doobie Brothers, Whitney Houston, Nine Inch Nails, The Notorious B.I.G leh T. Rex-te bakah  Ahmet Ertegun Award honoree Jon Landau leh Irving Azoff-te pawh an tel.

Rock And Roll Hall Of Fame Foundation chairman John Sykes chuan,"Inductee-te leh an chhungkuate bakah crew leh attendee-te himna tur leh hriselna lam an ngaihpawimawh avangin live event chu kan buatsaih thei dawn ta lo. Mahse HBO leh executive producer Joel Gallen-te thawhpuiin, 2020 inductee-te zahna lantirna atan program hlimawm tak kan buatsaih dawn tho a, an chanchin sawina hun leh music lama contribution an neihte bakah an hnungzuitu artist dangtea danglamna an thlen dante pawh tihlan a ni dawn," tiin a sawi.

Cleveland-a awm Rock And Roll Hall Of Fame pawh hawn a ni leh tawh a, August 14 hian kumina a hmasa ber atan inductee exhibit an nei ang. Nakkum Rock And Roll Hall Of Fame induction ceremony erawh Cleveland-ah neih leh theih an beisei. Rock And Roll Hall Of Fame hi hall of fame a nih piah lamah museum a ni a, Cleveland, Ohio, United States-a Erie lui kamah awmin rock music history hrang hrang pholanna hmun a ni.