Jaui hla thar 'I tan chauh' zaninah

Mizo zinga tunlai lengzem artist huhang ngah ber pawl Jaui chuan zanin hian Zonet-ah hla thar 'I tan chauh' a tichhuak dawn. He hla hi Hope Music production kut chhuak a ni dawn a, a hla pawh hi anmahni phuah niin, music leh recording zawng zawng pawh anni buaipui vek a ni a, music video hmuhnawm tur tak buaipuitu chu Remruata Bilywaif a ni thung.

Jaui hian he an hla tur project hi an buaipui rei tawh tih a sawi a,"He hla hi ka ngaihthlak tirh chuan mipa sak ka ngaithla a, nalh ka ti nghal hle. Kumin kumtir lamah khan a hla hi chu ka nei tawh a, mahse ka sak awm chi a nih leh nih lo hun rei tak ka ngaihtuah hnuah, lockdown ṭantirh lamah khan recording kan ti ta a ni," tiin Vanglaini a hrilh. Ngaihzawngte rinawm tura ngenna lam hla a ni dawn a, inngaihzawngte tan chuan a inngaihbel theih hle mai thei.  

Jaui hian project dang buaipui a nei nual tih a sawi a, hei hi a zai ngainatute tan chuan thu lawmawm tak a ni ngei ang. Kumin chhung hian a hla thar hi kan hmu deuh mawlh mawlh mai thei a ni. 

'I tan chauh' music video hi kum nga hnua thlir let leh pawha lung tileng thei tur lam rilrua an dah chunga an siam niin Jaui chuan a sawi a, bike-in hmun hrang hrangah an tlankual vel dawn a nih hmel. Kar leh lamah chuan a YouTube channel-ah a dah dawn bawk a, TV lama en ve hman lo tan duh hun huna hmeh chhuah theih turin a awm thuai dawn.