Captain America: Civil War-in sum a lalut hnem ber
Captain America: Civil War hi April 27, 2016 khan khawvel pumah release a ni a, US leh Canada aṭang ringawtin USD mtd 408.1 zet a lalut a, khawvel ram dang aṭanga a sum lakluh zawng zawng chu USD mtd 745.2 niin, North America aṭanga a sum lakluhte nen USD tld 1.15 zet a tling. Captain America film zinga pathumna a ni a, kum 2011 khan Captain America film hmasa ber, The First Avenger chu tihchhuah a ni a, khawvel pumah USD mtd 370 a lalut a, kum 2014 khan Captain America: The Winter Soldier tichhuak lehin, USD mtd 714.4 a lalut a, a film pathumna hian a hmaa mite a khum vek.
Sum lalut hnem ber pahnihna leh, USD tld lalut tling film pathum zinga pahnihna chu Finding Dory a ni. Finding Nemoaṭanga kan hmuh tawh Dory chanchin bik a ni ber. Finding Nemo kha kum 2003-a tihchhuah a ni a, a hlawhtling hle a, USD mtd 940.3 zet a lalut a, hemi hlawhtlinna avang hian Finding Dory hi an siam leh a hlawhtling leh hle. Nikum chhung khan USD tld 1.028 zet a hmuchhuak.
Zootopia chu sum lalut hnem pathumna a ni a, USD tld 1.023 a lalut. He film hi Disney animated movie 55-na a ni a, animation, voice cast leh theme-ah te fak a hlawh hle. Nikum chhung khan USD tld 1.024 a lalut a, film tihchhuah tawh sum lalut hnem zingah 25-naah a lang pha.
Film sum lalut hnem zinga lalut hnem ber ber pangate chu Disney tihchhuah vek a ni a, Disney tan chuan hlawhtlinna ropui tak a ni awm e. Sum lalut hnem palina chu The Jungle Book kha a ni a, USD mtd 966 a lalut a, Rogue One: A Star Wars Story chuan USD mtd 920 lalutin, sum lalut hnem pangana a ni.