Pentecost Fak Zai khuhhawn a ni ta

Mizoram UPC kohhran ṭhalai pawl, General Pentecostal Youth Department hnuaia Literature Committee leh Literature & Publication Board ṭangkawpin an buatsaih, mal zai intihsiak 'Pentecost Fak Zai' chu nizan khan a khuhhawnna neih a ni ta.

Dinthar Kohhran Hall-a Fak Zai khuhhawnna hi GPYD president Upa Vanneia Pudaite chuan a nei a, "Pentecost Fak Zai hian Pentecost literature-ah hmasawnna a thlen ka beisei a, zaithiam thar ṭha tak tak kohhranin kan neih belh dawn a ni, " a ti a, Fak Zai intihsiak buatsaih a ni chu lawmawm a tih thu a sawi.

Pentecost Fak Zai hi audition round chu online hmangin neih a ni tawh a, khuhhawnnaah hian top 20 result puan nghal niin mi 23 an tling a ni.

Top 20 intihsiakna hi Dinthar Kohhran Hall-ah neih chhunzawm tur a ni a, General PYD YouTube channel-ah live-a pekchhuah ṭhin tur niin, Zonet-ah en theih a ni dawn bawk.

Fak Zai top 20 inelna hi May 12 & 13 zanah neih a ni ang a, May 19 & 20-ah top 10 inelna neih tur niin, Grand Finale hi Dawrpui Multipurpose Centre-ah neih tur a ni thung dawn a, GPYD YouTube channel leh Zonet Zawlbukah live-a pekchhuah a ni dawn a ni.