Khawvel mipuite tan Ukraine indona hi a tawp tur a ni : UN Chief

United Nations leh ram ṭhahnem takte chuan Russia-in Ukraine a do mek chu titawp turin Ningani khan an ngen leh a, inremna nei tura ram pahnih inbiakna lam erawh sawilan a ni lo thung.

"Russia-in Ukraine chunga beihpui a thlak hi territory inpumkhatna tichhetu leh United Nations thuthlung bawhchhiatna a ni," tiin UN Secretary-General Antonio Guterres chuan United States huaihawta Security Council meeting neihah a sawi. "Ukraine, Russia leh khawvel mipuite hmakhaw thlir chungin he indona hi a tawp tur a ni," a ti.

Guterres chuan tun hnaiah Ukraine-a Mariupol khawpui aṭanga civil mi hruaichhuah hna thawh mek kalpui dante ngaihvenin Moscow leh Kyiv a lo tlawh tawh a ni.

Ningania Security Council meeting-ah hian member ram tam zawk chuan indona chu titawp tawh turin an ngen a, ngentu zingah hian China, US, Ireland, France leh Mexico-te pawh an tel.

UN-a China ambassador Zhang Jun chuan inbiakna hmang chauhin indona hi tihtawp theih a ni tih sawiin, tun hnaia Ukraine sipaite tana ralthuam thawnluh a ni ṭhin chu a sawisel.