Detective series hmuhnawm 'Boss Amanda - Damdawi In'

Zuali Chhangte leh Rintluanga G te channa Mizo series 'Boss Amanda-Damdawi In' chu May 3, 2022 zan khan tlangzarh a ni ta a, entute mit leh beng a tlai hle.

Tun hnaiah Mizo film chhuak thar a awm nual a, an genre pawh a inpersan hlawm viau mai. 'Boss Amanda - Damdawi In' hi detective lam a ni thung a, a tir aṭang phatin a hmuhnawm nghal. Zual-i'n a role a hnehsawh em em a, kha mawlh khan a tihmuhnawm!

Mizote hian series film en tur kan la ngah lo khawp mai a, 'Boss Amanda - Damdawi In' a rawn chhuak hi mi ṭhenkhat tan chuan chanchin lawmawm a ni ngei ang. Series dang ang lo takin a tir aṭangin a hmuhnawm nghal viau mai a, rilru pe taka en ngai chi a ni thung.

He sereis-ah hian season 1 leh 2 a awm dawn a, season khatah hian episode 3 a awm. Episode tin hi a hmuhnawm a, a leh pek en chakawm takin hnu an khar zel bawk. Damdawi In pakhatah mak tak maiin mi an thi fo mai a, thil thlen chhan dik tak chu chhui chhuah ngei a ngai. Theihtawp chhuahin an chhui a, an tum angin an hlawhtling nghal mai lo. Rin loh deuh deuh an lo inhnamhnawih bawk nen a case a buai chho ta nak mai le - sawi vek sen a ni lo, ena fiah chi a ni.

'Boss Amanda-Damdawi In' hi Mawitea Hauchhum (RDS SHOTS) film siam hmasak ber a ni a, a kut hnuah erawh mi thar a ni tih a hriat lo. A story a ngaihnawmin a changtute pawh an thiam em em - en manhla tak a ni. Thawnthu ziak thiam hmingthang Toni Ralte thuziak 'Boss Amanda' behchhana siam a ni tih hriat tel a ṭha awm e - Runmawi App lamah en theiha chhawpchhuah a ni tawh.