Europe-a celeb zinga hausa ber One Direction

Music an chawlhsan tawh chungin One Direction hian music khawvelah hlawkna tam tak an la nei a, a mala an kal hnuah pawh an la hlawhtling tho. Hei vang hi a ni ang, Europe-a celeb zingah hlawh hnem ber an la ni tho.

Forbes-in Europe-a celeb zinga sum lalut hnem a tarlanah hian footballer hlawh hnem tak tak pawhin an tluk lo. Amaherawhchu One Direction member hrang hrangte sum lakluh zawng zawng hmun khata chhut a ni a, chuvang chuan midang tan tluk an harsa deuh ang. Mimal anga an sum lakluh chhut ni ta se chuan sum lalut tam 10-ah an lang pha lo ang.

One Direction hian USD mtd 110 lalutin, Europe-a celeb zinga sum lalut hnem ber an ni. Pahnihnaah chu futbol thiam Cristiano Ronaldo a ni a, ani hian nikum chhung khan USD mtd 88 a lalut. Sum lalut hnem 10-ah hian Cristiano Ronaldo bakah Roger Federer leh Novak Djokovic te an lang. Music kaihhnawih ni lo lang dang chu Gordon Ramsay a ni a, ani hi chef hlawhtling, restaurant hlawhtlinpuitu a ni.

A hnam ang zawng chuan British mi an lang hnem ber. One Direction te hi British mi an ni a, Adele pawh a ni a, The Rolling Stones an ni bawk. Calvin Harris hi Scottish a ni a, British mi bawk a ni.

Sum an lakluh zawng zawng hi a tak tak anmahni neih a ni lo. Tuna sum lakluh an chhut hi chhiah an chawi hmaa mi a ni a, sum an lakluh hnem leh chhiah an chawi hnem a, chuvang chuan a tak takah chuan hei ai hian sum an lalut tlem ang.

Europe-a celeb sum lalut hnemte
One Direction ($110 million)
Cristiano Ronaldo ($88 million)
Adele ($80.5 million)
Roger Federer ($68 million)
The Rolling Stones ($66.5 million)
Calvin Harris ($63 million)
Paul McCartney ($56.5 million)
Novak Djokovic ($56.5 million)
U2 ($55 million)
Gordon Ramsay ($54 million)