BRIT awards-ah David Bowie hming a lang

Britain-a music lama inchawimawina sang, BRIT Awards nomination list chu tihchhuah a ni a, hetah hian nikuma zai­thiam thi ta, David Bowie hming pawh hmun hnihah kan hmu a, a thih hnuah award a dawng hlauh a nih chuan a ropuina a zual lehzual hle ang.

David Bowie hi British mi a ni a, category pahnihah a hming a lang a, pakhat chu Album of the Year a ni a, pakhat chu British Male Solo Artist a ni. Album of the Year-ah hian Bowie-a album ‘Blackstar’ a lang.

British Male Solo Artist-ah David Bowie bakah Craig David, Kano, Michael Kiwanuka leh Skepta te an lang a, British Female Solo Artist-ah Anohni, Ellie Goul­ding, Emeli Sande, Lianne La Havas leh Nao te an lang. British-a group leh band zingah The 1975, Bastille, Biffy Clyro, Little Mix leh Radiohead te nominee an ni.

February 22-a sem tur BRIT Awards-ah hian khawvela mipa leh hmeichhe zaithiam larte pual category a awm. International Male Solo Artist-ah Bon Iver, Bruno Mars, Drake, Leonard Cohen leh The Weeknd te an lang a, Female Solo Artist-ah chuan Beyonce Knowles, Christine and the Queens, Rihanna, Sia Furler leh Solange Knowles te nominee an ni.