Kumina Spotify-a album hit ber Bad Bunny 'Un Verano Sin Ti'

Bad Bunny album thar 'Un Verano Sin Ti' chu Spotify lamah a hit nghal rem rem hle a, record pahnih a siam nghal!

Vawi hnih lai artist, Spotify lama a zai an stream nasat ber record lo siam tawhtu Bad Bunny chuan Zirtawpni khan a album pangana 'Un Verano Sin Ti' a tlangzarh a, chumi hmang chuan record pahnih a siam nghal a ni. Puerto Rican rapper album thar 'Un Verano Sin Ti' hi tun dinhmunah chuan kumin atana album stream nasat ber a ni a, chumi bakah chuan ni khat chhunga artist mal zai Spotify-a stream nasat ber record a siam bawk.

Bad Bunny zai hi ni khat chhungin vawi maktaduai 183 lai stream a ni a, Drake-a record lo siam tawh, nikhata mtd 176.8 stream a neih chu a khum chiang hle.

A album tihchhuah ni, Zirtawpni khan Spotify Daily Top Songs Global chart-ah chuan 'Un Verano Sin Ti' -a hla awm 23-te chu top 30-ah a lang vek a, top 10-ah pakua lai a lang nghe nghe.

Kum 2020 leh 2021 khan Bad Bunny hi khawvel pumah Spotify most-streamed artist a lo ni tawh a, a album tihchhuah a hlawhtlinpui thei hle. Kum 2020 khan 'El Ultimo Tour Del Mundo' hmangin Spanish album Billboard 200 chart topper ni thei hmasa ber record a lo siam tawh bawk.

Kum 28 mi Bad Bunny album tharah hian hla 23 a awm a, Chencho Corleone, Jhay Cortez, Tony Dize, Rauw Alejandro, Bomba Estéreo, the Marías leh Buscabulla-te chu a thawhpui a ni. "Callaíta" leh "Moscow Mule" te chu single-in a tichhuak tawh a ni.