Crazy Rich Asians spin-off-ah Gemma Chan

'Eternals' star Gemma Chan chu Crazy Rich Asians spin-off-ah a chang dawn a, Harry Shum Jr nen an chang dun dawn.

Gemma Chan leh Harry Shum Jr-te hian Crazy Rich Asians film pangngaia an role- Astrid Leong-Teo leh Charlie Wu bawk kha an chang leh dawn. Kevin Kwan series lehkhabu pahnihna 'China Rich Girlfriend' behchhana siam tur niin Deadline lamin an tarlan dan chuan Jason Kim chuan script a ziak dawn a ni.

A lehkhabuah chuan Astrid hi a main character Nick Young cousin a ni a, Charlie hi a ngaihzawng hmasa ber a ni thung. An inhual hial tawh a, mahse Astrid chhungte'n an duh loh avangin an inhualna chu an titawp leh ta a ni.

English actress Gemma Chan hi Hollywood film hit tak takah a inlan nual tawh a, chung zingah chuan MCU film hit tak pahnih- Captain Marvel leh Eternals pawh kha a tel. Jack Ryan: Shadow Recruit, Fantastic Beasts and Where to Find Them leh Transformers: The Last Knight-ahte pawh khan a chang tawh bawk.

Tunah hian a channa pahnih Don't Worry Darling leh True Love chu tlangzarh a la ni loa, Don't Worry Darling hi kuminah tlangzarh hman an tum a ni.