Khawvelah hri kai mek mtd 5.5 chuang awm

Khawvelah hripui leng mek, Covid-19 kai hmuh tawh chu mi maktaduai 12 chuang an awm tawh a, an zinga mtd 6.5 chu enkawl dam ni tawh mah se he hri la kai mek hi mtd 5.5 chuang an la awm. Covid-19 vanga thi hi mi 5,48,896 an tling tawh bawk a ni. 

Humanitarian group Oxfam chuan hripui leng nghawng vang hian kumin chhungin ram hrang hrangah mi mtd 122 chu ei tur tlachhamin an awm phah dawn niin a sawi. 

US chu Covid-19 kai tamna leh he hri vanga thi tamna ber ram a la ni chhunzawm zel a. US-ah hian hri kai hmuh tawh hi mi maktaduai thum an chuang tawh a, mi 1,31,000 chuangin an thihpui tawh bawk. 

Nilaini khan US-ah hian hri kai  hmuh thar mi 60,000 chuang an awm a, ni khata hri kai hmuh chhuah tam ber ni nia sawi a ni. Florida state-ah hri kai hmuh thar hi 10,000 chuang awmin, Texas-ah 9,500 chuang leh California-ah 8,500 chuang an awm a ni. Hetih lai hian US-a hri kai hmuh an tamna chhan hi test an neih ṭhat vang nia sawi a ni bawk. Tun kar chhungin ni khatah test 6,40,000 zel nei anga chhut an ni a, kar hnih liam tak khan ni khata test neih zat hi 5,18,000 zel anga chhut a ni bawk a ni. Hri kai hmuh zat hi pung chak hle mah se, he hri vanga thi zat punna erawh a tlahniam thung. 

Japan khawpui, Tokyo-ah nimin khan hri kai hmuh thar mi 224 an awm a, April 17 hnua ni khata hri kai hmuh chhuah thar tam ber ni a thleng. 

Japan ramah hian hri kai hmuh tawh hi mi 20,261 an awm a, mi 982 in an thihpui tawh bawk a ni. Hri leng vanga khawpuia khuah­khirhna siamte thlahdul chhoh a ni ṭan tawh a, kartawp aṭang hian sorkar chuan infiamna hmunpui te pawh hawn a tum tawh a, zanin aṭangin stadium-ah football leh baseball games en turin mi 5,000 chin an kal a phalsak dawn a ni. Mahse hri kai hmuh belh an la nih reng avangin mi tam tak chuan khuahkhirhna hi la thlahdul lo turin sorkar an nawr. 

China sorkar chuan coronavirus leng mek do letna tura a damdawi, vaccine, test kit leh Chinese traditional medicine siamna kawngah thawhpui tur a zawng mek tih a sawi. 

Science and technology ministry chuan hemi chungchanga thuchhuah a siamah, he hri leng mek hi rang zawka hriat a nih leh, a damdawi siam a nih thuai theihna turin technology thar siam a, enchhin thuai an duh tih a sawi. Vaccine siam mek zingah Phase 1 leh Phase 2 clinical trial nei zo tawhte chu an dah pawimawh tur thu a tarlang bawk. China ramah hian hri kai hmuh tawh mi 84,900 zinga a tam zawk chu enkawl dam an ni tawh a, ram danga hri leng vanga buai mekte ṭanpuina kawngah tha pawh a thawh nasa tawh hle a ni. 

Mexico-ah Nilaini khan hri kai hmuh chhuah tam ber ni a thleng a,  hri kai hmuh thar hi mi 6,995 an awm a ni. Hemi ni vek hian hri vanga thi mi 782 an awm bawk. 

Nilaini thlenga hri kai hmuh tawh hi mi 2,75,003 an ni tawh a, hri kai tam lamah Spain an lehpel tawh. Hri vanga thi hi mi 32,796 awmin, Covid-19 thihpui tam ram pangana a ni bawk. Sorkar chuan test neih tam a nih loh avangin, hri kai zat pawh hi official-a record aiin an tam a rinawm thu a sawi. 

Nigeria sorkar chuan Covid-19 vanga an rama school kharte hawng tawh tura thutlukna a lo siam tawh chu a sut leh. 

Education minister Adamu Adamu chuan presidential palace-a thuthar thehdarhtute a kawmnaah Covid-19 hri lengin ziaawm lam a pan a, hri kai an pun tawh loh hunah chauh school hawn a ni dawn tih a sawi. Kar liam ta khan Nigeria sorkar chuan an rama primary leh secondary school zirlai, kum tawp exam hmachhawn turte tana school hawn thuai a ni dawn tih hi a lo sawi tawh a, mahse a thutlukna siam hi sut lehin school-te hawn mai an ni dawn rih lo tih a sawi leh a ni. Nigeria-ah hian Covid-19 kai mi 30,249 an awm a, heng zinga mi 12,373 chu enkawl dam tawh niin, he hri vanga thi hi mi 684 an awm tawh bawk.

South Africa-ah mi mtd 1.5-te tana thlan tur ngaihtuah 

South Africa-a Covid-19 hri leng hluarna hmun thar, Gauteng province-a tualchhung thuneitute chuan mi maktaduai 1.5 te tana thlan ngaihtuah a ngaih dawn thu an tarlang.

Gauteng province-a Covid-19 kai hi mi 71,000 an chuang tawh a, hei hi South Africa ram pumpuia hri kai zat aṭangin 33% an tling pha a ni. An ram puma hri kai hmuh tawh hi mi 2,15,000 an awm tawh a ni. Covid-19 vanga thite phumna tur hmun hi Gauteng province-a provincial health MEC Dr Bandile Masuku leh forensic pathology service aṭanga official-te an en a, Masuku chuan thla hnih liam ta aṭang khan thlan hmun tur hi an buaipui ṭan tawh thu a sawi a, vanduaithlak taka chhiatna lo thleng thei lakah pawh an inring reng thu a sawi.