Pakhatna ni lo zaithiam lar Hlawhtlinna hi chart aṭangin a ni ringawt lo
Ed Sheeran hi pakhatna luah pha lo zinga zaithiam hlawhtling a ni a, award pawh a dawng nual. Amaherawhchu tunah chuan pakhatna a rawn luah tak avangin a hming hi kan thaichhe thei tawh. Ani lo midang an la tam mai.
Raptress lama khawvelin a dah san Nicki Minaj hi music khawvelah chuan a hmel aiah talent a neiṭha an tih luai luai a ni. Hetiang tak hian hlawhtling mah se, Billboard 100-ah chuan pakhatna a la luah hauh lo. Billboard-in chart tenau deuha a siam dang, Hip-hop velah te chuan pakhatna a luah fo a, chart pui berah erawh pakhatna a la ni lo. Pakhatna a thlen teuh ber ṭum chu kum 2014-a a hla tihchhuah ‘Anaconda’ kha a ni a, pahnihna a thleng.
Ariana Grande hawina lam hi music lam chanchin ziaktute hawi lam a ni ve mai. Chutiang chuan hlawhtling viau mah se, Billboard 100-ah pakhatna a la luah chhin lo hrim hrim. Nicki Minaj pawh thlen san lamah chuan a la tluk lo a, ‘Side to side’ kha Billboard Hot 100-ah palina a thleng a, a thlen san ber a ni.
Twenty One Pilots pawh hi Top 10-a lang thei hla pathum chu an nei a, pakhatna em erawh an la ni thei lo. ‘Stressed out’ leh ‘Heathens’ te khan pahnihna an thleng ve ve. Selena Gomez pawh hi a hlawhtling a, a chanchin hi chanchinbuten chhuah an châk; mahse, pangana bak hi chu a thleng thei lo. ‘Good for You’ leh ‘Same old love’ te kha pangana an thleng a, kha aia sang erawh a la thleng chhin lo. Chutiang bawkin Fifth Harmony pawh hian a sang ber an la luah ngai lo. Nikum June thla khan palina an rawn thleng a, chu bak chu hla hit eltiang, thleng sang si an la nei lo.
Kylie Jenner-i’n USD nuai 5 a thawh
Naupang hmui kakte zai ṭhat an nih theih nan Kylie Jenner chuan a hmingthanna leh larna chu hmang ṭangkaiin, USD nuai nga zet a thawh. He pawisa hi a lip kit hralhna aṭanga a thawh chhuah a ni. Smile Train nen ṭangkawpin naupang hmui kak zai nana pawisa tuak nan Smile tih hmingin shade a tichhuak a, hemi hmang hian USD nuai nga a tuak chhuak ta a ni. Pawisa hmang hian naupang hmui kak mi 1,800 zet chu a zai ṭhat theih dawn a ni.
Liam Payne-a’n AIDS a do
One Direction member Liam Payne chuan AIDS doa hmalaknaah RED tan theihtawp a chhuah mek. RED tana pawisa thawhtu chu Liam bulah hun a hmang thei dawn. Liam Payne chuan RED tana pawisa thawhtu chu Los Angeles-ah a pan vang vang ang a, hotel ṭha berah ei tur vel a treat ang a, a recording studio-ah a kalpui bawk dawn. RED hi U2 frontman Bono-a’n ṭanpuitu pawl a din a ni a, AIDS doin tunlai hian hma an la nasa hle.
Fifty Shades Darker-ah Rita Ora hla phuah
British mi zaithiam leh lemchan thiam Rita Ora hian hla phuahte pawh a lo thiam em em mai a, a hla phuah pakhat chu Fifty Shades Darker film original soundtrack-ah pawh dah a ni dawn. Rita Ora hla phuah hi ‘Kiss Me’ tih a ni a, a hla phuah hi amah bawkin a sa dawn. He film-ah hian a chang nghal dawn bawk a, Mia Grey lemah a chang ang.