Hollywood legend Kirk Douglas a thi

American actor, producer, director, leh author Kirk Douglas chu Nilaini khan kum 103 mi niin a thi.

Kirk Douglas hi kum 1916 khan New York-ah a piang a, Hollywood "golden age" an tih hunlaia lemchan thiam langsar ber zinga mi a ni. Kum 1946 khan a film hmasa ber The Strange Love of Martha Ivers a chang a, 1949-a tihchhuah, boxing film Champion vangin Oscar nomination a ṭum khatna atan a hmu bawk.

A fapa Michael Douglas vangin hriat a hlawh lehzual bawk a ni.

Kirk hian a fapate pathum- Michael, Joel leh Peter-te bakah a nupui pahnihna 1954-a a neih Anne Buydens-te a thihsan.

Michael Douglas leh a nupui Catherine Zeta Jones-te chuan an pa thi chu an ui thu sawiin, an ngai dawn hle tih an sawi.

Michael chuan a unaute nena an pa Kirk Douglas thih thu an puan a ngai chu hrehawm a tih thu sawiin, "Khawvel tan chuan legend, lemchan thiam movie golden age hunlai a mi a ni........mahse kei leh ka unaupa Joel leh Peter-te tan chuan pa a ni," a ti.

"A piancham hnuhnung bera ka thu hrilh leh thudik awm reng tur hmang hian kan thlah ang e. Ka pa- Ka hmangaih lutuk che a i fapa ka ni hi ka inchhuang hle a ni," tiin a pa chu a thlah a ni.

A monu  Catherine Zeta Jones pawhin Instagram-ah an thlalakdun post-in a ngainat thu leh a ngaih thu a tarlang ve bawk.