Ellen DeGeneres-i’n record a siam Priyanka-i’n a vawi 2 nan award a la

Nilaini zan khan People’s Choice Awards sem a ni a, Ellen DeGeneres-i chuan record siamin,

ṭum khata People’s Choice Awards-a award dawng hnem ber a ni a, Indian actress Priyanka Chopra pawhin a vawi hnih nan People’s Choice Awards a dawng leh.

Ellen DeGeneres tana chuan a hlawhtlinzia tarlanna hmanrua a ni ringawt e. People’s Choice Awards semah hian award 20 ngawt a dawng a, ṭum khat award dawng hnem ber a ni. Justin Timberlake pawhin ‘khawvela mi ṭha berte zinga mi a ni’ a ti hial. A award dawn zawng zawng hi stage-ah pawh a tlar tham hle!

DeGeneres award dawn zinga langsar zual chu Favorite Daytime TV host, Favorite Animated Movie Voice leh Favorite Comedic Collaboration te a ni.

Indian actress Priyanka Chopra pawh Bollywood chhungah chauh ni loin Hollywood-ah pawh actress hlawhtling a nihzia a phochhuak. Nikum khan Priyanka Chopra hian People’s Choice Awards-ah award a lo hawn tawh a, kumin­ah hian Favorite Dramatic TV Actress award a dawng leh. TV show hmuhnawm leh hlawhtling tak, Quantico-a a chan aṭangin he award hi a dawng. Nikum khan People’s Choice Awards-ah hian Quantico avang tho hian Favourite Actress In A New TV Series a lo dawng tawh.

Kumin People’s Choice Awards-ah hian category 64 lai a awm a, Joel McHale chuan a host a, Los Angeles-a Microsoft Theater-ah sem a ni. Kevin Hart, Britney Spears, Dwayne “The Rock” Johnson, Fifth Harmony, Blake Lively leh Johnny Depp te chu award dawng langsar dangte an ni.