Donald Trump lakluhah tute nge zai dawn?
US president-a Obama lakluh a nih ṭum kha chuan zaithiam lar tak takte hmuh tur an tam a, Donald Trump-ah thung chuan a dang deuh. Zaithiam tam tak hian an ngaina tlat lo.
Mi lar kal tur langsar chu Angelina Jolie pa, actor tho, Jon Voight a ni. Ani hi chu a zaithiam lem lo a, mahse thu a sawi mai thei an ti. 3 Doors Down an inlan dawn niin an sawi a, country music lama hlawhtling Toby Keith a inlan bawk ang. America’s Got Talent-a finalist Jackie Evancho a perform dawn a, ‘God Bless the USA’ hla hmanga hriat hlawh Lee Greenwood pawh an zai ang. Zaipawl lamah chuan Mormon Tabernacle Choir an zai bawk ang.
A tir lam deuh, nikum khan zaithiam zai tur anga sawi an awm nual a, mahse sawm tel leh loh an awm nual. Chung zingah chuan Motley Crue-a mi Vince Neil pawh sawm loh zingah a tel a, Andrea Bocelli pawh hi an sawm lo niin an sawi a, ṭhenkhat chuan a duh lo niin an sawi bawk. Sawmna hmu, zai duh lo zingah Elton John te, Celine Dion te, Garth Brooks, KISS leh Charlotte Church te pawh an tel.
Zirtawpni hian Donald Trump hi lakluh a ni tawh dawn a, US president 45-na tur a ni. Lakluh inkhawm hi US Capitol Building-a West Front-ah a ni ang a, thutiam nan Abraham Lincoln-a hman hnu Bible leh an chhungkaw Bible a hmang ang. President atana lakluh inkhawmah hian pastor paruk ṭawngṭaina hmang tur an awm a, Billy Graham-a fapa, Franklin Graham a ni a, a dang chu New York Archbishop, Cardinal Timothy Dolan, Revd Dr. Samuel Rodriguez, Pastor Paula White, Rabbi Marvin Hier leh Bishop Wayne T. Jackson te an ni.