Melania Trump US First Lady tur

Michelle Obama thlak a, US First Lady tur Melania Trump hi nikum khan Michelle Obama thusawi ang deuh chiah chiaha thu a sawi avang khan sawisel hlawh viauin, mi nuihzat hlawh viau mah se, Donald Trump-a president atana lakluh a nih tak avangin an ngaisang emaw, ngaisang lo emaw US First Lady a nih tho tho a ngai ta.

Slovenia-a piang, model, chhe lo tak, Donald Trump-a nupui Melania Trump hi kum 1970 April 20 khan a piang a, kum 2001 khan US-ah a pem a, kum 2006 khan US khua leh tui a ni chauh. US First Lady ni tawh zingah ram danga piang pahnihna a ni a, kum 1825-a John Quincy Adams-a nupui, Louisa Adams nen First Lady zinga US pawna piang awm chhun an ni.

Tunhmaa Yugoslavia ram ṭhina piang kha a ni a, a pa hi car leh bike zuartu a ni a, a hming tak chu, Slovenian ṭawngin, Melanija Knavs a ni. Kum 5 mi chauh a nih lai aṭangin modelling lamah hian a lo tel ve ṭan tawh a, commercial ang taka model a nih hmasak ber chuan kum 16 mi chauh a la ni. Hetah hian Slovenian fashion photographer Stane Jerko chuan thla a laksak. Kum 18 mi a nihin Milan, Italy-ah modeling agency-ah a inziak lut ṭan a, heta ṭang hian a eizawnna tak tak a lang ṭan ta a ni. Kum 1992 khan Jana Magazine chuan ‘Look of the Year’ a thlanah pahnihna a ni.

Kum 1996 aṭang khan New York lamah a inpho thla ṭan a, Paolo Zampolini nen contract siamin, visitor visa hmangin US-ah hian modeling hmangin a intheh ṭan. Kum 1998 September thla khan New York-a Fashion Week party-ah Donald Trump nen hian an inhmu a; hetihlai hian Donald Trump hi Marla Maples nen an innei a, amaherawhchu an nupa inkar erawh a buai hle a, innei hming pu siin an awm hran lai a ni. Kum 1999 aṭang khan an inngaizawng a, an inngaihzawnna pawhin ngaihven a hlawh ṭan hle. Kum 2000-a Reform Party president tur thlanna velah Melania hian Donald Trump a pui nasa tawh hle. Hun rei tak an inzui hnuah, kum 2004 khan Donald Trump leh Melania te hi an inhual a, kum 2005 January 22 khan Palm Beach, Florida-a Bethesda-by-the-Sea, The Episcopal Church-ah an innei ta a ni.

US president-a Donald Trump a tlin theih nan hian Melania Trump hi a pawimawh berte zinga mi a ni ang. Kum 2015 daih tawh khan, “Nasa takin ka tiphur a, America tana a tih tur leh a tihsak theihte hi ka hre chiang em a; America mipuite hi a hmangaih a, ṭanpui a duh a, chuvang chuan phurna tam tak ka pe a ni,” tiin US president chuh tura nawrtu a nih thu a sawi.

Melania Trump
Ṭawng chi ruk - Slovenian, French, Serbian, German, Italian leh English te a thiam

Khawvela chanchinbu lar - GQ, Vanity Fair leh Sports Illustrated-ah te pawh a lo lang tawh

Kum 2010 khan a jewelry line te, Melania Timepiece te a tichhuak

Kum 2013 aṭangin skincare line a nei leh

Donald Trump hi White House-ah a lut nghal ang a, Melania Trump leh a fapa Barron te chu New York-a an inah an la khawsa zui ang. Barron hi a sikul kalna pangngaia kaltir zel an duh a ni