Amazon-in Gandhi-a hmel chuanna slipper an tibo leh

Amazon chuan slipper-a Mahatma Gandhi-a hmai chuanna an zuar a, mahse India mipui mai ni lo, sorkar lam pawhin an ngaihmawh a, la bo tura an hrilh hnuah Amazon hian an thil zawrh hi an tibo ta.

External Affairs minister Sushma Swaraj chuan hetiang, India hnam tana mi pawimawh, slipper-a a hmel chuantir hi India mipui ngaihdan leh hmuh danah chuan inhmuhsitna leh inhnuaichhiahna anga ngaih a nih thu sawiin, Amazon hi an thil zawrh chu zuar tawh lo turin a hriattir a, Amazon hian an ngenna ang hian an tihlawhtling ta a ni.

Hman deuh pawh khan Amazon hian India flag ang doormat an zuar tawh a, hei pawh hi lak botir an ni tawh. Slipper bik hi Amazon Canada-a zawrh a ni a, India-ah chuan lei theih a ni lo. Hetianga sorkar lamin an ngen takah chuan Amazon Canada hian an thil zawrh hi an la bo a, an website mai bakah an marketplace-ah pawh zawrh a ni lo ang tiin Amazon thuneitute chuan an sawi.