'Doctor Strange In The Multiverse Of Madness' a ropui!
Marvel Cinematic Universe phase four film mi tam takin an nghahhleh 'Doctor Strange In The Multiverse Of Madness' chu Zirtawpni liam ta khan US-ah tlangzarh a ni ta a, film review-tute mit a tlung a, film entute mit a tlung a, la en lote'n an en chak a, a sum lakluh pawh a tam nghal rem rem hle.
Ni thum chhungin kum 2022-a sum lalut tam pathumna
Benedict Cumberbatch, Elizabeth Olsen, Chiwetel Ejiofor, Benedict Wong, Xochitl Gomez, Michael Stuhlbarg, leh Rachel McAdams-te channa film hian tlangzarh a nih hma aṭangin thawm a nei ring tawh a, en chakawm tawk lekin footage leak-te a awm bawk nen, an tlangzarh chiah chu Cinema Hall an bawh a ni ber.
North America-a theatre 4,534-ah tichhuakin $187,420,998 lai a lalut. 'The Batman' khumin kumin chhunga film tlangzarh, tlangzarh kara sum lalut tam ber a ni nghal! Ram hrang hrang aṭanga a sum lakluh belhkhawm phei chu $411,482,997 a tling hem tawh mai!$mtd 200 velin he film hi an siam a, an budget chu ni thum chhung lekin a let aia tamin an khum tawh. Kumina film tlangzarh zinga sum lalut tam pathumna a ni nghal a, 'The Batman' leh 'The Battle at Lake Changjin II' chiah tluk loin a sum lakluh dan rate en hi chuan sum lalut tam ber a nih thuai a rinawm.
'Doctor Strange In The Multiverse Of Madness' hi Sam Raimi direct a ni a, film lar tak tak- Spider-Man leh Evil Dead-te pawh a direct tawh. Chung zawng zawng zingah chuan 'Doctor Strange In The Multiverse Of Madness' hian tlangzarh karah sum a lalut tam ber.
He film hi critics lamin an fak rawn a ni ber a, Raimi direct dan hmang an fak a, visual effect leh a music score bakah a changtute che vel an fak hle. Cumberbatch, Olsen, leh Gomez-te chu fak hlawh zual an ni. Rotten Tomatoes lamah pawh review-tu an tam a, mi 336 laiin review tawhin rating 6.50/10 an pe a ni.
--I love you in every universe--
Avengers: Endgame tlangzarh a nih khan internet, a bikin social media leh memes lamah Tony Stark ṭawngkam 'I love you 300' kha a lar rem rem hle a, chutiang deuh chiah chuan Zirtawpni khan Doctor Strange ṭawngkam 'I love you in every universe' chu social media lamah a lar hle.
Box Office-ah film dang thawm a reh
'Doctor Strange In The Multiverse Of Madness'-in thawm a nei ring lutuka, film dang a reh deuh dukin a hriat hial!
Chart hmasa lama pakhatna 'The Bad Guys' chu pahnihna niin $9,573,985 a lalut a, Doctor Strange 2 nen an sum lakluh a inthlau turu. 'Sonic the Hedgehog 2' chu pathumna ni thungin $6,019,743 a lalut a ni.
Box Office Mojo chart-ah film thar tlem azawng a awm a, 'Happening', 'Vortex', 'Remembering Heaven', 'In Front of Your Face' leh 'Lux Æterna'-te chu film thar langte a ni.
Box Office top 10:-
1 Doctor Strange in the Multiverse of Madness $187,420,998
2 The Bad Guys $9,573,985
3 Sonic the Hedgehog 2 $6,019,743
4 Fantastic Beasts: The Secrets of Dumbledore $4,264,246
5 Everything Everywhere All at Once $3,528,416
6 The Northman $2,864,430
7 The Lost City $2,763,701
8 The Unbearable Weight of Massive Talent $1,585,927
9 Memory $1,385,522
10 Father Stu $875,09