Israel-a hmun thianghlim aṭangin Freeman an hnawt­chhuak!

Nova Science en ṭhinte chuan Morgan Freeman-a narrate ngaihnawm ṭhinzia in hria ang. Nova Science hian documentary series chi hrang hrang an siam a, chutah chuan narrator angin Morgan Freeman hi an hmang ṭhin. Tunhnaiah National Geographic te nena an documentary siam pakhat, The Story of God in Jerusalem-ah Morgan Freeman hian ‘Myth’ tih ṭawngkam a hman avangin an awmna hmun thianghlim aṭangin an hnawtchhuak nghal!

The Talk on Monday show-a an kawmnaah Morgan Freeman hian he a thil tawn hi a sawi chhuak. “Khawvela hmun ṭhenkhatah hian ṭawngkam ṭhenkhat hman miah loh tur a awm,” a ti a, “Pakhat chu ‘Myth’ tih hi a ni. Eng sakhaw hmun thianghlimah emaw i awm chuan ‘thawnthu’ tih hi sawi reng reng suh. Kei pawn ‘thawnthu’ tiin ka sawisak a, min chhuahtir nghal vang vang mai a ni,” a ti.

Tun ṭuma documentary an siam hi Nova Science Now ta ni loin National Geographic leh Highlight Films tena nikum October thlaa an siam a ni. He documentary-ah hian rinna leh theology chungchang te, thihna leh thih hnu piah nunna chungchangte tarlan a ni a, Holy Sepulchre (Thlân Thianghlim - Isua an phumna) pawh a tlawh. ‘Myth’ tih tak hi khawi hmun bera a sawi nge tih a tarlang lo a, Holy Sepulchre chhungah emaw a ni mai thei.