Tom Hardy A film channain a taksa a tichhia!

A dik ve thei tho. Film star-te hi an film chan tura mi, character ang thei ber tura an taksa siam chawp a ngai ṭhin. A changin an in-diet vak a, a changin an inei thau vak ṭhin. Hetiang nun avang hian Tom Hardy chuan a taksain a chhiat phah a ni a ti.

Tom Hardy hi kum 2009 khan Bronson film-ah a chang a, kum 2012 khan The Dark Knight Rises-ah a chang leh. Bronson film-ah hian palian leh sek tak angin a chang a, The Dark Knight Rises-a Bane lema chang tur pawhin palian leh sek tak nih a ngai bawk. Hengte avang hian nasa taka a inei thau a ngai. Tuna a chan leh tur hi Al Capone lem a ni dawn a, hetah pawh hian pathau lam pang anga a lan a ngai leh ang.

Tom Hardy chuan, “Ka taksa hi ka tichhiain ka tichhe zel dawn a nih hmel. A tak takah chuan ka palian lutuk lem lo a, palian tak anga lang tur hian nasa taka ka inei a ngai a, ka taksa zawh tawk bak aia rit ka nih a ngai. Ka taksa hian a la zo lo mai ang tih ka hlau hle,” a ti.

“Ka la naupan deuh lai kha chuan a tih theih mai a, ka taksa pawhin a tuar lutuk lo. Tunah chuan ka kum a lo tam deuh tawh a, chuvang chuan ka taksa pawh a derthawng tawh zawk,” a ti a, hetianga a film chan tur avanga inei thau leh inei len vak hian a taksa a tihchhiat tial tial a ring.