Mimi Renthlei rimawi khawvelah a la chuai lo

Pasal a nei tawh a, music lam pawh a ngaihtuah hman tawh meuh loh karah nikum khan music video a tichhuak a, chu a music video tihchhuah hmang chuan Mimi Renthlei chuan Hontrade International Ṭhazual Lengzemah pakhatna a rawn luah.

Kum 2010 khan 'A her leh si' tih hla music video a dah hnua music video single a tihchhuah leh hmasak ber 'Hrilh an ka mawi si lo' tih hla hi nikum October thla khan a tichhuak a, he hla hi tunah chuan pa­khatna a rawn thleng ta a ni. Mimi Renthlei hla thar, pakhatna a nihpui mek hla hi Sangtea phuah a ni a, Blue Wave Records-ah record a ni.

Mimi Renthlei music video 'Hrilh an ka mawi si lo' tih hla hi nikum November 14-a chart tihchhuahah khan pasarihnaah kan hmu ṭan a, December 12 khan panganaah a kai chho a, nikuma chart tihchuah hnu­hnun berah khan pathumna a thleng hman. January 9 khan pahnihnaah a awm a, chumi hnuah pakhatna a rawn thleng ta a ni.

A hmaa pakhatna, LilZo hla 'Ka sawm che' tih chu pahnihnaah a chhuk thla a, Mizo band hlawhtling Casey's Secret chuan an hlawhtlinna rawn lantir zelin, pangana aṭangin pathumnaah an rawn chho. Grace-i hla 'no khat' chu pakuana aṭangin palinaah a rawn kai chho nawlh a, Kimkima hla hit 'Ka zei an ti ṭhin' tih chu panganaah kan hmu bawk.

Hontrade International Ṭhazual Lengzem
1 Mimi Renthlei - Hrilh an ka mawi si lo
2 Lilzo - Ka sawm che
3 Caseys Secret - Duhaisam
4 Grace - No khat
5 Kimkima - Ka zei an ti Ṭhin
6 Mercy Remsangmuani - Hmangaihtu ngaiin an Ṭap e
7 Samuela Chhangte - Ka hmangaih reng ang che
8 BOG, Hlimhlimi, RickyDrac - Runah
9 Tetea - Duhaisam tikimtu
10 Thiamchantira - Palai tir ang aw