Toby Mac-a'n Hla thar a tichhuak

Kristian hip hop artist, DC talk member ṭhin Toby Mac chuan Ningani liam ta khan hla thar '21 Years' tih a tichhuak.

Toby Mac hian nikum October 23 khan a fapa upa ber  Truett McKeehan a chan a, chumi hriatrengna atan chuan he hla hi a tlangzarh a ni.

"Tunhnai thla hnih thum vel chhung chu ka hun tawn harsat ber a ni. Min thlawp avangin ka lawm e," tia sawiin, " Ka hun paltlang hmanga eng emaw ziah hi ka tihdan phung a ni a, mahse hemi kawngah hian thil thar ka tawng a ni.  Ka fa piang hmasa ber chungchang ka ziahchhuah chu hlaah a lo chang ta. '21 Years' hla hi ka hla phuah duh ngai loh a ni," tiin a hla thar chungchang hi Instagram-ah a sawi.

Toby Mac hi kum 55 mi lai a ni ve tawh a, DC Talk kha a hunlaia khawvela Kristian band lar ber zinga mi anni ṭhin a, solo-a a kalhran hnu pawh hian a la lar chhunzawm zel a, Grammy awards pawh eng emaw zat a la tawh a ni.