Kate Middleton BAFTA-ah a kal an phal lo mai thei ; Milar dangte a dah nil ang tih an hlau

Duchess of Cambridge hi a chhiat lohzia khawvelin an hria a, hei tak hi a ni, BAFTA hotute pawhin an hmuh­a an hlauhthawn chu. BAFTA-ah a kal an phal ve lo mai thei.

BAFTA-a staff senior ṭhenkhat chuan BAFTA Awards sem hunah Kate Middleton hi kal phal ve loh nise an ti a, an tihna chhan chu a chhe lo si a, film star chhe lo ve tak takte ai pawhin a langsar lah dawn si a, chuvang chuan film star-te a dah nil vek dawnin an hria a, an hlauthawng a ni. BAFTA chief executive, Amanda Berry chuan he hlauhthawn, harsatna thleng thei hi thlentir loh dan tur a ngaihtuah mek.

BAFTA president hi Kate Middleton pasal, Prince William a ni. February thlaa BAFTA Awards an sem hunah a kal ngei a ngai a, chu­tihrual chuan a nupui a hruai pawh a rinawm a, mahse miin an hlauthawng. A-list dangte pawh an tel kim viau dawn a, mahse photo­grapher-tena an tin rawn tur chu Kate Middleton a ni ngei dawn. Hetiang a nih hlauh chuan actress chhe lo tak takte kha a chhiat lohna hian a khuh vek ang a, a dah nil dawn niin an hria a ni.

Duchess of Cambridge, kum 35 mi hi BAFTA Awards an semnaah a la inlan ngai lo. Kumin hian BAFTA chuan Prince William te nupa hi tel ngei turin an sawm a, Kate Middleton pawh hi a inlan a rinawm hle. BAFTA Awards hi February 12 khian Royal Albert Hall, London-ah sem a ni ang.