Boruak bawlhhlawh avanga thih hun loa thi an tam
Indian Institute of Technology, Bombay chuan kum 1995 aiin a let hnih ngawtin Mumbai leh Delhi-ah kum 2015 chhung khan thih hun loa thi an tam zawk tih a tarlang.
IIT Bombay hian Mumbai leh Delhi-a boruak bawlhhlawhin heng khaw pahniha mipuite a nghawng dan, kum 10 zelah an zir chiang a, chutah chuan heng khaw pahniha mihringte hi boruak bawlhhlawh avanga an dam hun tur dam loh phah an tam hle. India ramah hian mihring dam chen tura ngaih (life expectancy) chu kum 66.21 a ni. Hemi dam thleng loa thih hi mithiamte chuan vên theih niin an ngai a, dam thleng loa thihna hi premature death an ti.
Zirchianna aṭanga a landanin, kum 30 chin chung lam, dam thlen tur china ngaih dam thleng loa thi, boruak bawlhhlawh avanga thi hmate hi Mumbai leh Delhi-ah mi 80,665 zet an tling. Boruak bawlhhlawh avanga mihring hriselnain a tawrh hi kum 10 kal ta aiin nasa takin a pung a, thâwkna lama harsatna nei pawh a kum têlin an pung bawk.
Sum leh pai lam aṭanga chhut pawhin heng khaw pahnihte hian boruak bawlhhlawh avangin sum an chân phah nasa hle. Kum 2015 khan boruak bawlhhlawh avanga khaw pahnih sûm hloh hi USD tld 10.66 (vbch 70,000) zet a tling a, chu chu India ram pumin sum a thawh chhuah zawng zawng aṭanga zaa 0.71 zet a ni phak.
Mumbai aiin Delhi-ah hian thih hmana hi a nasa zawk. Motor khu avang te, thil sakna leh siamna avanga vut nawi leng vel te, thilsiamna hmun aṭanga boruak chhia leh ek chhia avangtein nasa takin Delhi mipuiten an tuar. Heng avang hian Delhi-ah kum 1995 khan an dam tur chen dam pha ta lo mi 19,716 an awm a, kum 2015 kha chuan 48,651 zet an tling tawh. Mumbai-ah thung chuan mi 19,291 ten kum 1995 khan an thih hma phah a, kum 2015 kha chuan mi 32,014 an tling tawh a ni.