Gaming News Mangṭha mai le, FIFA! 'EA Sports FC' tih duah a ngai tawh dawn

12th May, 2022

Kum 1993 aṭang khan video games siamtu Electronic Arts chuan Fédération Internationale de Football Association (FIFA) thawhpuiin football game an tichhuak a, a tirah chuan 'FIFA International Soccer' tiin a hming an vuah. Kum 1995 aṭangin FIFA 95 tia a hming vuahin kum tin game thar an tichhuak a, Guinness World Records phei chuan sports video game franchise hralh kal berah a lo puang hial tawh a ni. Mahse, kum 29 zet an thawhdun hnuah EA leh FIFA chuan an thawhdunna chu an titawp dawn ta.

Kumin kum chawhnu lamah FIFA 23 an tichhuak leh anga, chu chu football game lar ber FIFA chu FIFA tia kan sawi tawpna a ni tawh dawn. EA lam chuan EA Sports FC tiin nakkum lam aṭang chuan an game hming chu an thlak dawn ta niin an sawi.

EA Sports vice president David Jackson chuan BBC zawhna chhangin an hmalam huna 'brand' dang siam hun tawh nia an hriat avangin kawng dang an hawi dawn ta tih a sawi a, FIFA lam pawhin game dang tihchhuah an tum thu an sawi ve bawk.

EA Sports FC tiin a hming thlak ni dawn mah se game kalphung erawh a danglam dawn lo a nih hmel a, FIFA lak aṭanga an zalen hnuah erawh game kheltute tan experience thar chhawp chhuah an tum niawm tak a ni,"Kum 10 liam taa FIFA nena kan inremnaah khan khuahkhirhna eng emaw a awm avangin thil tih theih chin kan nei a, mahse chung chu tunah chuan kan tithei dawn ta a ni," a ti.

EA chuan infiammi 19,00, team 700, stadium 100 leh league 30 lai mai inremna an lo siampui tawh avangin a hming tih loh chuan thil danglam tak a awmin a rinawm loh. Inremna an siampui tawh zingah chuan Premier League, Bundesliga, La Liga leh Uefa-te pawh a tel. Amaherawh chu Fifa World Cup game ho erawh kan khel thei tawh rih dawn lo niin a lang.

FIFA game hi...
Nikum thleng khan FIFA game franchise hi khawvel pumah copy maktaduai 325 vel zet an hralh tawh a, Guinness World Records chuan 'best-selling sports video game'-ah a lo puang hial tawh a ni. Ram hrang hrangah anmahni ṭawnga khelh theihin an chhawp chhuak tawh bawk nen, hralh a kal hle.

FIFA game thar ber FIFA 22 kha nikum December thla thleng khan copy maktaduai 9 vel an hralh hman a, game maktaduai 460 vel an khel hman niin an chhut bawk.