Zaninah Fak Zai top 20 inelna ṭan dawn

Pentecost Fak Zai top 20 intihsiakna chu zanin dar 7:30 hian neih ṭan a ni dawn a, zaithiam 23 thlanchhuah aṭangin zaninah hian mi 12 an inlan phawt ang a, May 13, zan dar 7:30-ah a thawh hnihna neih leh a ni ang a, zaithiam 11 an inlan thung ang.

Pentecost Fak Zai top 20 intihsiakna hi General PYD YouTube channel-ah live-a en theih tura pekchhuah a ni dawn a, television lamah chuan, a zan khatna hi Zonet Bawhbelah, May 14, Inrinni zan dar 8:00-ah pekchhuah a ni ang a, a zan hnihna hi Zonet Bawhbelah, May 15, Pathianni zan dar 8:00-ah chhuah a ni bawk ang.

Mizoram UPC kohhran huang chhunga zaithiam intihsiakna hi Dinthar Kohhran Hall-ah neih a ni dawn a, top 20 hi music track nen intihsiakna neih a ni ang a, top 10 chin erawh live music nen intihsiakna neih tur a ni thung. Fak Zai hi May 6 zan khan a khuhhawnna neih tawh niin, audition round hi online kaltlangin kalpui a lo ni tawh a ni.

Fak Zai chief judge Rev. Dr. Ngurthanpara Sailo chuan, "Kohhran huang chhung zai intihsiakna ni mah se, Mizoram mipui zaia min awi thei tur zawnna a ni a, zaithiam chhuak thar ṭha tak tak an awm theih ka beisei a ni," tiin Vanglaini a hrilh.

Pentecost Fak zai hi General PYD Literature Committee leh Literature & Publication Board ṭang dunin an buatsaih a ni.