Lalpa tana nun hlantu Baby Lalrintluangi

Mizo ṭhalai zingah entawntlak leh chawimawi phu ṭhahnem tak an awm a, chutiang zinga tlar hma ber awh thei tur zinga mi chu missionary kan vui liam tak Baby Lalrintluangi hi a ni a; nimahsela a pawi ber chu Mizoram pumin a hming kan hriat hi a thih thu kan hriat nen a inrual ta hi a ni.

Khaw tereuh te, Bawktlang khuaa Pu Zoramnghinga fanu nula kum 28 mi thihna hian Mizoram chhung leh pawna Zofate thinlung a khawih a, Pathian tana a nun hlantu thihna hian mittui tam tak a ko chhuak - Basra, Jaigaon Bial (Siliguru Field), West Bengal-a Mizoram Presbyterian Kohhran missionary Baby Lalrintluangi chu June 17 khan bawihsawmtu pawh nei loin a rawngbawlna hmunah lu na avangin thi chhawngin a let a, hmunpui lama damdawi-in an panlaiin a rawngbawlsak a Lalpa hnenah a chawl ta.

Missionary ṭhahnem tak an awm a, missionary thi tate pawh kan nei. Baby thihna hian mipui a nghawng nat bik chhan hi a thih dan lungchhiatthlak avang te, khawhar leh riangvai taka chhel tak chung sia rawng a bawl vangte leh, hmeichhiaah pawh nula lehnghal, hmelṭha var bawk si heti taka Pathian ram zauna atana ṭhahnemngai taka a thawhlai taka lainatawm taka a thih vang hi a ni ngei ang.

Rev. Vanlalruata Pastor, Jaigaon Pastor bial viltu chuan Baby rawngbawl dan heti hian a ziak:

2018-ah Banarhat station-ah rawngbâwlna a ṭan. Kum 2019 March-ah Basra station thar hawn niin Basra-ah hian a thih ni thlengin a awm. Member 15 neiin, ring lo leh kohhran mumal neilo te'n rawn bêl zêlin inkhâwm hi inah an leng ngâi lo a; Basra a awm hnu hian ringthar baptisma chang pariat lai a siam hman.

Non formal education hmangin nâupang ho tuition a pe ṭhîn a, he rawngbâwlna aṭang hian chhûngkaw khat member pangate'n Lal Isua hnung zui tura inpein baptisma an chang. Home visit a ngaipawimawh ṭhîn hle a, member-te inah chawte a ei nghâl mai ṭhîn a, chu chuan inpawhna thûk tak a siam a ni.

Basra ah ringlo chhûngkuate bâwngpui thla khat chuang zet bo tawh chu ṭawngṭâi tûra an ngên hnuah, Pathianin a ṭawngṭâi chhâng nghâlin mak tak maiin bâwngpui hi tlâiah a lo haw leh a ni. Damlo leh ran damlo te thlengin a 

ṭawngṭâi sak ṭhîn a, mi tam takin damna an chang. Baby-i hian damlo te tân damdâwi lei sak fo bakah doctor-te a râwn sak bawk ṭhîn.

Ringlote zînga Chanchin Ṭha puandarh hi a ngaipawimawh a, Bible tract sem, counselling leh ṭawngṭâite a taima hle. Ringlo nâupangte pawh Pathian hla te a zirtîr ṭhîn. An khaw paho hi zuin a tibuai ṭhîn hle a, khawtlâng nuhote hui khâwmin nuho chakna hmangin zu hi nasa takin an do a, paho ṭhenkhatte'n zu in an sim phah a, a la in ṭhînte pawhin a hmuh lai hian zu an in ngam ngâi lo.

Covid-19 avanga lockdown boruak-ah member-te thlamuanin a uap ṭha hle a, kohhran in tinah ṭum hnih amah insêngsoin an mamawh, ei leh in tûr a sem. A hun hnuhnungah hian lockdown chung pawhin rawngbâwlna a kalpui nasa zual a; ring lo chhûngkaw hnih Lal Isua Chanchin Ṭha rawn ngaihventute zîngah nasa takin rawng a bâwl a, baptisma chante an duh a, mahse an chhûngkua an la hmin kim loh avângin ṭawngṭâina nên kan la ngaihchan mêk lâiin Pathianin a chatuan rama châwl tûra a seng ta a ni.

Baby hi Siliguri damdawi-in an pan meklaia boral a ni a, Siliguri-a Mission Compound-ah a ruang lak a ni. Thlahna hun hman a ni a, ama hla duh tak, "Thihna lui ral ka lo kai ta, khawvel mite'n an hrethiam lo, He lei in hi ral mahse la, Ka nunna chu Krista a ni," tih hla nen an thlah ta a ni.

June 18-ah Mizoram an rawn lut a, hemi zan hian Bawngkawnah a thlahna hun hman a ni a, lockdown boruak hnuaiah pawh mi ṭhahnem tak an kal khawm a, kohhran hrang hrang leh mimalin an ralna an pek khawm Rs 4,52,500 a tling.

He huna thusawitu Rev K Lalrinmawia chuan, "Lockdown dan bawhchhiat ngai khawpa amah suntu lo pungkhawm hi mi 35 mai kan ni thei ta lo. Tun ang zankhaw tairek leh ruahsur hnuaiah pawh heti zat kan pungkhawm hi indan beh rual a ni ta si lo a, Bawngkawn Kohhran leh Synod aiawh kawpin thupha ka chawi mawlh mawlh a ni; min lo ngaidam hram teh u. He nula awm nem te, Krista pasalṭha huaisen ni tlat si ruang hian dan rual lohin min ko khawm miau a nih hi!" a ti hial.

A sawi zelnaah, "He nula hi a mak ania! Basra hi mobile phone hman hleih theih loha signal neih loh a tam em em, a kilkhawr a. Jaigaon nen a inkarah ngaw paltlang a ngai a, lui kan a ngai bawk. An pastor leh Field Secretary-in a awmna chu hmeichhe mal awm rengna atan a him loang tih hlauin hmun ualau deuh zawk, Siliguri lama sawn mai 

ṭhain an hria a, amah an han berawn chu a lo duh der lo. 'Min khawngaih hi chu ka lawm ngawt mai. Mahse maw, ringtu tlemte awm te hi an baihvai dawn a; buhseng tur a la tam bawk si. Khawngaih takin, min sawn in tum ṭalh a nih pawhin kumin chauh tal chu min la awmtir hram hram rawh u,' tiin a dilin zu han dil a! A feh chhan a hria a, a kotu leh tirtu mamawhna a kal chhan tih a va inhrechiang tak em! Hetiang missionary hi kan ui takzet a ni.

June 19-ah North Vanlaiphai bula khaw tereuh te, in 100 pawh tling lo khua Bawktlang chu an thlenpui a, khawtlangin mittui nen Krista pasalṭha ruang hi an hmuak. Synod Mission Board Secretary Rev C.Zorammawia'n a vui a; ama hla duh tak hmang bawkin an thlah liam leh ta a, he hla hi ama puala an puah niawma mawi a ni: