Green Day-in Linkin Park an um pha

Green Day hla thar ‘Still Breathing’ chu Billboard hnuaiah Alternative Songs chart-ah pakhatna a rawn ni ta a, heti hian Linkin Park an rawn nih rual a, he chart-a pakhatna ni thei hla nei hnem ber dawttu an rawn ni ve ta. He chart chanchina pakhatna luah ngun ber chu Red Hot Chilli Pepper an ni a, vawi 13 zet pakhatna an luah tawh a, Green Day leh Linkin Park te hian vawi 11 ve ve an luah thei.

Green Day hian tuna an hla ‘Still Breathing’ hi an album Revolution Radio aṭanga single-a hla an tihchhuah pahnihna a ni. A hmain ‘Bang Bang’ hla an lo tichhuak tawh a, hei pawh hian pakhatna a thleng. Green Day album Revolution Radio hi nikum October thlaa an tihchhuah a ni a, chawlhkar khat chhungin copy 188,000 zet an hralh thei a nih kha.

Billboard Alternative Songs chart-ah hian Foo Fighter chu pakhatna ngah ber pathumna an ni a, an hla 10 lai mai pakhatnaah a awm thei tawh a, U2 chu an hla pariat hmangin pakhatna an luah tawh bawk.